storie furlane

LA STRUTURE ISTITUZIONÂL DAL PATRIARCJÂT

2010-06-12T01:48:00.000-07:00

La figure principâl dal stât e je chê dal patriarcje, vescul e cont, che pal solit al ven di une famee nobile dal mont todesc, judât a tignî il podê di diviers funzionaris che a viodin dai aspiets militârs, di ordin public, di economie, di control e di aministrazion dal teritori.
Plui o mancul dut il Friûl al è sot dal patriarcje ma, cemût che al è normâl te Ete di Mieç un pôc in dute Europe, al è dividût in piçulis jurisdizions di variis figuris, intun complès di formis diferentis di autoritâts e di dirits: in Friûl a son plui di cent cjistiei, tignûts di fameis nobilis o di struturis religjosis tant che convents o badiis che a stan sot dal patriarcje, ma che a àn podê diret su lis vilis e su la campagne ator; lis citâts principâls si rezin cun statûts determinâts dal patriarcje.

Il cjistiel di Vilalte, un dai testemonis plui rapresentatîfs
de architeture dal podê medievâl in Friûl

LA ISTITUZION DAL STÂT PATRIARCJÂL

2010-02-24T04:32:00.000-08:00

Za dal secul X, i imperadôrs a vevin tacât a favorî il podê temporâl dai patriarcjis di Aquilee rispiet al marchês o al cont dal Friûl, considerâts pôc fedêi o pôc incisîfs.

Tal 1077 l’imperadôr Indrì IV al è in Italie propit par regolâ une contese cul pape sul podê imperiâl di nomenâ i vescui. Il pape lu veve scomunicât, e cussì Indrì al à di frontâ une rivolte di nobii, ma i ven impedide la strade par tornâ in Gjermanie: in cheste situazion si poie sul patriarcje di Aquilee, Siart, che al è bielzà plui potent dal cont dal Friûl e che al vierç a Indrì IV i pas des Alps par lâ a Nord. Daûr di chest fat l’imperadôr al rive a tornâ in Gjermanie e ai 3 di Avrîl al premie il patriarcje dantji il podê politic di cont cun prerogativis ducâls sul Friûl.

L'imperadôr Indrì IV, che tal 1077 al à puartât insom il

procès che al à fat cjapâ ai patriarcjis di Aquilee il podê temporâl sul Friûl

La invistidure di un vescul tant che cont e torne une vore buine pal impeadôr e ancje di altris bandis e je une vore doprade tal mont todesc: il vantaç al è che un vescul nol pues vê fîs legjitims e duncje nol pues pretindi di lassâ in ereditât il so titul, cemût che a fasin invezit i nobii laics. In cheste maniere l’imperadôr, fasint pesâ il so podê ancje te sielte dal vescul, al pues meti a controlâ un teritori impuartant simpri une persone fidade. Cussì al nas il stât patriarcjâl furlan, che in pratiche al reste distacât de Italie e al è ben insedât tal sisteme politic imperiâl.

CAMBIS DEMOGRAFICS E AMBIENTÂI TE LUNGJE DURADE: DE FIN DAL IMPERI ROMAN AL SECUL XII

2009-10-06T23:18:00.000-07:00

Za cui ultins secui dal imperi roman vueris, epidemiis e crisis economichis a vevin produsût un câl demografic, che al va indevant, no dome in Friûl, ma un pôc pardut intai teritoris che a jerin stâts dal imperi, fintremai al secul X.

Un tant al fâs che tante tiere e vegni lassade pustote e che si lavori dome i cjamps che a rindin di plui e che a son dongje des posizions che si rive a difindi miôr in câs di vuere. In cheste maniere tante part de Basse e torne a impaludâsi e a imboscâsi e il bosc al torne plui fis ancje di chês altris bandis dal Friûl.

Un tant si compagne ancje cun chel mudament economic che al veve di jessi par resons demografichis: de coltivazion dal forment, une vore convenient te grande rêt di distribuzion e di marcjâts dal Imperi roman, si passe a chê di grans plui juscj pai piçui contadins, tant che la siale, e l’ambient salvadi al torne a jessi une risorse economiche fondamentâl, par vie de racuelte di pomis e plantis, pal arlevament, massime dai purcits, e pe cjace.

Cul spopolament rispiet ai timps dai romans, il bosc, te Ete di Mieç, al torne a jessi protagonist tal ambient e te economie furlane. Une vore di testemoneancis di chest fenomen a restin ancje te toponomastiche, cun nons tant che Bosc, Boscat, Selivis, Selvucis e v.i.

Propit tra il secul VI e il secul XII al è un riscjaldament dal clime, che al fâs cressi la cuote massime dai boscs in mont tra i 100 e i 200 metris plui di ce che al è vuê.

SITUAZION SOCIÂL E LINGUISTICHE DILUNC DAI SECUI VIII-XI d. di C.

2009-06-02T01:15:00.000-07:00

Tal mont feudâl la societât e je dividude in maniere une vore nete. I feudataris a tegnin cjistiei e tieris par cont dal imperadôr e cu lis tieris a àn il domini ancje sui contadins, la plui part de popolazion, che a son obleâts a lavorâ i cjamps e a fâ prestazions di diviersis sortis e si ridusin a nivel di sierfs: in sostance a pierdin la libertât e no àn nancje il dirit di movisi o di maridâsi cence il permès dai parons.

A restin fûr di cheste cundizion misare une piçule classe di artesans, piçui proprietaris e marcjadants che in gjenerâl a vivin tes citâts e tai centris plui grues.
In bande di cheste che e je la societât laiche, e je la societât religjose, che e à une impuartance culturâl, economiche e politiche su dute la comunitât.

La badie di Rosacis, che si pense fondade tal secul IX, e je stade par secui un centri di podê spirituâl, politic e economic.

Su la fin dal ducât langobart une grande part de popolazion dal Friûl e fevele une lenghe che aromai e je tant diferente dal latin e che e je simpri plui dongje a vê ducj i caratars dal furlan. In cheste situazion a son doi contats linguistics gnûfs che a puartin la lenghe di origjin latine a disvilupâ caratars gnûfs: i feudataris e i funzionaris, che a vegnin pe plui part dal mont todesc, e i colons slovens de ripopolazion.
I feudataris a son pôcs e in curt a imparin la lenghe dal puest, cundut che salacor no lassin la lôr lenghe gjermaniche, stant che a restin in contat cu lis lôr tieris e cu lis lôr fameis di divignince. I colons slovens a son une vore, ma si sparnicin in teritoris li che e je ancjemò int che e fevele la lenghe romaniche e si messedin cun chê: a man a man si fondin ad in plen e a pierdin la lôr lenghe, si ben lassant une olme impuartante su chel che al sarà il furlan.

IL RECUPAR DAL FRIÛL DOPO DES SCORSADIS DAI ONGJARS

2009-04-23T23:07:00.000-07:00

Cu la subordenazion de Contee dal Friûl ae Baviere e ae Carintie al tache un fat fondamentâl che al durarà par trê secui e che al segnarà la storie furlane: par dut chest timp il Friûl al è dividût te politiche, te societât e te lenghe de Italie e al fâs part dal mont politic gjermanic.
In cheste situazion e cjape simpri plui pês politic e aministratîf une figure che prime e jere stade fondamentâl pal plui pe religjon, ven a stâi il vescul di Aquilee, che di secui si clamave patriarcje.
Za de seconde metât dal secul X i patriarcjis a tachin a vê in don dal imperadôr simpri plui tieris e plui bens e a finissin par deventâ une vore plui potents dal stes cont. I patriarcjis a viodin de ricostruzion dal Friûl e in dutis lis zonis vuastadis e lassadis pustotis a clamin a vivi int slovene, che e permet il recupar de economie e che si messede cul rest de int.

Esemplis di peraulis furlanis derivadis dal sloven

CERNICULE
CIESPE
CAGNE
COLAÇ
COS
CREP
MULE
PUSTOTE
RAZE
'SAVE

LA EUROPE TAI SECUI IX e X

2009-03-23T01:07:00.001-07:00

La situazion politiche in Europe tor dal an 1000.
(Mape di commons.wikimedia.org)

In cheste ete, daspò che l’imperi franc si veve dividût tai reams di France, di Italie e di Gjermanie, la cjase di Sassonie e rive a unificâ la corone di Gjermanie e di Italie e e rifonde l’imperi.
Za dal secul IX tal Mâr dal Nord a son une vore fuartis lis scorsadis dai vichincs, o normans, che a rivin fintremai a concuistâ une part de France setentrionâl, che e cjape di lôr il non di Normandie, part des Isulis britanichis, a colonizin la Islande e a rivin fintremai in Groenlande e in Americhe; a Sudest, dilunc dai flums de Russie a rivin fin sul Mâr Neri.
Inte penisule iberiche centrâl e meridionâl e tal meridion di Italie e in Sicilie al è simpri plui fuart il podê musulman, cundut che une buine part de popolazion e reste di lenghe romaniche.

Lis concuistis dai vichincs (dal ros al zâl) e lis lôr incursions (in vert)
(Mape di commons.wikimedia.org)

LIS INVASIONS DAI ONGJARS

2009-02-02T09:53:00.000-08:00

Propit tal timp di Berengari al scomence un dai moments plui tragjics de storie dal Friûl, in part ancje par colpe dal stes re di Italie che par bati i siei nemîs al clame i ongjars, che za a vevin tacât a fâ incursions tremendis, ma i scjampin di man e a fischin dut ce che a cjatin.

I Ongjars, une altre popolazion di cavalîrs predons tant i Uns e i Avars, si vevin fissât in Panonie, e di li, tra il 899 e il 951, a passin cetantis voltis lis Alps, par meti a fûc e a tai lis citâts e lis campagnis de Italie stentrionâl: ogni volte a passin pe Basse furlane, copant, brusant, fiscant e puartant vie int di tignî o di vendi di sclâfs. Chestis disgraciis a butin dut il Friûl intune cundizion di puaretât e di debilece e in chescj moments la impuartance politiche dal Friûl si sbasse une vore: par cualchi an al fâs part de marcje di Verone e Aquilee, prime sot dal ducât di Baviere e po dopo sot di chel di Carintie.

IL FRIÛL TAI SECUI IX e X

2009-01-14T15:07:00.000-08:00

Dopo de repression e de persecuzion cuintri dai sorestants langobarts fate a pene concuistât il Friûl, la situazion si cuiete: tai puescj di podê a vegnin metûts nobii francs, ma il ducât al va indevant a jessi cui siei cunfins e al devente une vore impuartant pe espansion dal imperi carolin a soreli jevât, massime pe concuiste de Istrie e de Panonie, li che i avars, prime predons pericolôs, a finissin vitimis di une vuere di stermini.

Intant a Cividât, aromai plui lontan des operazions militârs, al torne a cjapâ pît un resuriment di culture alte e leterarie che al jere za tacât cui langobarts e a funzionin une scuele e une biblioteche impuartantis.

Su la fin dal secul IX il Friûl, che al jere passât di ducât al veve za vût une riorganizazion comitâl tai prins agns sot dai francs, al devente marcje slargjantsi une vore a Ovest, tant che la funzion di capitâl e passe a Verone, ma intant il domini franc al è za daûr a rompisi in plui tocs par vie des rivalitâts tra i diviers erêts de corone o tra i nobii des diviersis bandis: in particolâr si formin trê coronis, chê di Francie, chê di Gjermanie e chê di Italie.

Tra lis figuris che si movin di plui intes lotis per corone di Italie al è Berengari, marchês dal Friûl, che al diven di une famee di nobii francs cun leams di parintât impuartants e che al cîr prime la corone di Italie e dopo chê imperiâl. Al rive te sô imprese, ma dome a cost di vueris civîls e cence rivâ a tignî pardabon il podê dal so titul: infin al ven sassinât a tradiment tal 924.

LA ESPANSION DAI FRANCS E IL SISTEME FEUDÂL

2008-12-14T22:59:00.000-08:00

Cun Carli il Grant il domini dai francs si slargje simpri di plui e in gracie de incoronazion di bande dal pape, tal 800, al cjape il titul di imperi, cjapant sù la ereditât ideâl di ce che al jere stât l'imperi roman.

Il model dal stât al è chel feudâl: il sovran si fâs prometi fedeltât di ogni singul nobil che al devente vassal: il rapuart che al nas al è un leam personâl di sumission e di protezion e il sovran al pues cambiâ di puest un feudatari cuant che al vûl, ancje se cul timp i vassai a cirin di fâ deventâ ereditari il lôr titul. Al è propit cuintri di chest sisteme incentrât sul sovran che il duche furlan Rotgaut al veve lotât, par tignî il sisteme langobart che impen al garantive une grande autonomie o fintremai une indipendence dai ducâts.

La espansion dai francs (imagjin di commons.wikimedia.org)

LA GLESIE FURLANE IN ETE LANGOBARDE E FRANCJE

2008-11-03T22:58:00.000-08:00

Cuant che i langobarts a rivin in Friûl il patriarcje di Aquilee al scjampe a Grau cuntune part dai citadins plui siôrs, par pore di violencis e di robariis. Il rest dai predis al reste tal so puest cence che a sedin grues problemis, e sot dai langobarts a àn il lôr patriarcje di Aquilee, antagonist di chel di Grau, che invezit si poiave sui bizantins: in cheste maniere a tachin a jessi doi patriarcjis in oposizion tra di lôr, chel di Aquilee e chel di Grau, e cheste situazion e larà indevant par secui.

La badie di Siest e jere nassude tal secul VIII pe donazion di trê nobii langobarts e e à mantignût par secui la sô impuartance. (foto di www.comune.sesto-al-reghena.pn.it)

I langobarts, daspò dai prins contrascj e suspiets, a rivin a tignî un bon rapuart cu la glesie, tant che sul moment de concuiste dai francs une des figuris che a difindaran di plui la libertât dal Friûl langobart al sarà propit il patriarcje, Sigualt. Inte stesse situazion, une part dal clericât e poie i francs e jude in maniere impuartante par supuart politic e logjistic, ancje inte prospetive de espansion dal imperi di Carli in Grant ancjemò plui a Est: in cheste suaze e je di prin plan la figure di Paulin di Aquilee.

LA FIN DAL DUCÂT LANGOBART DAL FRIÛL

2008-10-19T09:09:00.001-07:00

Tal 774 i francs a tachin une grande ofensive cuintri dai langobarts: in pôc timp a rivin a concuistâ la plui part dal ream. Rotgaut, il duche di Cividât, al sielç di no mandâ cul re il so esercit e al met devant di dut la sigurece e la libertât de so tiere: une prime armade di francs e ven batude su la Livence e Carli il Grant, cundut che aromai al è paron dal ream langobart, al à di ricognossi la autoritât di Rotgaut sul Friûl, ancje se dome par pôc timp. Intant che il re dai francs al à di frontâ altris problemis il duche dal Friûl al cîr di formâ une coalizion par tornâ a meti in pîts la monarchie langobarde: chest compuartament al è avonde particolâr, se si pense che intant che i francs a concuistavin il ream a Pavie nol risulte che i furlans a vessin judât tant il lôr re e si pues pensâ che par Rotgaut e fos plui impuartante la libertât dal Friûl che no la esistence dal ream langobart, e che al ciri di tornâ a metilu sù par vie che al jere un sisteme che i garantive une vore plui autonomie dal imperi carolin, fondât sul sisteme feudâl e cuntune la autoritât centrâl un grum plui fuarte.

Un umbon di scût langobart, vâl a dî la part centrâl e plui fuarte, fate di metal, intant che il rest dal scût e jere pal solit di len e di corean.
(imagjin di http://www.cividale.com/citta/immagini.asp)

Informât dal pape, Carli in Grant al scuvierç il plan e tal 776 al môf une armade plui grande cuintri dal Friûl: Rotgaut al è ferît in bataie e po dopo decapitât, la plui part de nobiltât langobarde furlane e ven perseguitade.

LA EUROPE TAI SECUI VI-VIII

2008-10-06T00:22:00.000-07:00

Intant che i langobarts si insedin in Friûl e inte plui part di Italie, intal rest de Europe la situazion e je cheste: l’imperi bizantin al ten ancjemò diviersis zonis di Italie, i possediments orientâi e africans dal imperi roman, in chê che e jere stade la Galie si impon il ream dai francs, inte penisule iberiche i visigôts a formin un lôr ream, in Britanie lis popolazions celtichis, romanizadis o no, a patissin sot des invasions simpri plui fuartis di tribûs gjermanichis. Te Europe orientâl e je simpri plui definide la espansion des popolazion slavis, che e rive fintremai in Carinzie e in Friûl, cun chei che plui indevant si podarà clamâ slovens. In Panonie al è il popul dai Avars, parint dai Uns.

I Avars (imagjin gjavade di baike.baidu.com/view/25590.htm), dopo di un prin acuardi cui Langobarts, a jerin simpri pronts a fâ incursions tai teritoris dongje, e tal 613 a vevin fintremai cjapât e fiscât Cividât, puartant vie in sclavitût une buine part de int. Tra chescj al jere ancje un von dal storic cividin Pauli Diacun che te sô Historia Langobardorum al conte di chescj fats cun vivece dramatiche.

Dal secul VII e tache ancje la grande espansion musulmane: popolazions arabis e convertidis al islam a rivin a concuistâ une cierte part dai possediments asiatics dal imperi bizantin, ducj chei africans e fintremai a cjapin la plui part de penisule iberiche e a rivin in France, li che a vegnin fermâts e parâts indaûr dai francs.

La espansion musulmane (imagjin gjavade di www.istitutosuperiorelagrangiavc.it)

Propit la fuarce dai francs e segne la fin dal ream langobart, che al cirive di unificâ i siei possediments in Italie cuintri dai bizantins e ancje cuintri dal pape. Propite il pape, che al tache a esercitâ ancje il podê temporâl e no dome chel spirituâl, al clame i francs di Carli il Grant par jessi difindût e po dopo lu consacre imperadôr.

IMPLANT POLITIC E SOCIÂL DAL DUCÂT LANGOBART

2008-09-17T07:04:00.000-07:00

Rivâts in Friûl i langobarts a àn une struture sociâl tipiche dai popui gjermanics: la posizion plui alte e je tignude di un re, che al ven elet tra i miôr vuerîrs e che al ten la corone fin che al vîf; i oms libars a formin la fasse alte de societât, a àn il dirit di puartâ armis e di vê part te vite politiche.
La plui part de int des tieris concuistadis, che e lavorave la tiere sot dai pôcs parons siôrs dal imperi roman, e jentre te classe dai aldis, ven a stâi i semilibars, che a son vincolâts ae tiere che a lavorin, ma che a puedin riscatâsi e deventâ libars.
I sclâfs a son simpri obleâts a servî i parons, ma a àn cualchi dirits in plui che no tal mont roman (par esempli a puedin vê cualchi proprietât e vendile, a ben che in cunvigne cul lôr paron).
La femine e je sometude ae autoritât dal cjâf di famee o dal om.
I langobarts a tegnin la lôr leç e lis lôr tradizions juridichis, ma no lis imponin a chei altris: la int des tieris concuistadis e pues lâ indevant a tignî il dirit roman.

Une golaine di elements di veri e cristal, furniment tipic des feminis langobardis
(imagjin di www.cividale.com/citta/immagini.asp)

Cul timp i langobarts si messedin cu la int di chenti, stant che la lôr leç e permet la union in matrimoni tra oms e feminis di popui diferents: in cheste maniere il lôr mût di vivi e la lôr societât a pierdin cualchidun dai caratars plui tipics e a cjapin sù diviers elements de civiltât romanizade. Par esempli i langobarts deventin catolics e a cjapin sù la lenghe di chenti, che aromai e je a mieç tra ce che al jere il latin e ce che al sarès stât il furlan. Intun pâr di secui la fusion e je complete, ancje se par plui timp e larà indevant la pussibilitât di rispuindi in tribunâl ae leç langobarde, a chê romane o fintremai a chê gotiche.

Altâr di Ratchis, che si pues viodi a Cividât.

Il Ducât langobart al dure pôc plui di doi secui, ma al segne une vore a fuart la storie dal Friûl: cheste istituzion e nas tant che realtât autonome, une des tantis che a formavin il ream langobart, ma tra chestis e devente scuasit un stât indipendent. I duchis di Cividât, in gjenar elets in autonomie dai oms libars di chenti, a dan dispès prove di calcolâsi aleâts e no sudits dal re e a puartin indevant une lôr politiche interne, militâr e foreste indreçade prin di dut al interès dal Friûl e dome intun secont moment aes dibisugnis dal re e dal ream.

IL DUCÂT LANGOBART DAL FRIÛL

2008-09-09T13:24:00.000-07:00

Tal 568, passant lis Alps, il re dai langobarts Alboin al decît di fondâ tal prin teritori che al cjape une struture politiche e militâr autonome une vore fuarte: un ducât di dâ in man a so nevôt Gjisulf. Chest ducât langobart al nas cun capitâl Cividât, Forum Iulii, e al fasarà nassi il non e salacor la idee stesse dal Friûl. Se za prin dai langobarts si pues cjatâ une cierte individuazion teritoriâl dal Friûl tai municipis carnics di Aquilee, Cividât, Zui e Concuardie, cul ducât e je la prime istituzion politiche che e segne cun precision lis liniis dal Friûl e che al à une sô autonomie politiche.

Il non di cumò di Cividât al ven dal latin CIVITATEM, vâl a dî "citât": di fat tal timp dai langobarts e inmò par secui al jere l'unic centri dal Friûl che si podès nomenâ pardabon citât.
Aquilee aromai e leve al mancul e chei altris paîs a jerin plui piçui.
Intant il non latin di Cividât, che al jere Forum Iulii, stant che al veve funzions di capitâl, al è passât a dut il teritori dal ducât, e al è restât fintremai in dì di vuê, trasformât in "Friûl".

I langobarts si insedin in maniere fisse in Friûl e, cemût che al jere za ûs dal imperi roman cui aleâts, a cjapin un tierç des tieris. Ancjemò in dì di vuê la misurazion tardizionâl de tiere e ten con di chest fat storic: il cjamp furlan a la grande al corispuint ae unitât di misure romane, il cjamp furlan a la piçule al corispuint ae misure vignude fûr daspò de spartizion cui popui gjermanics.

I LANGOBARTS

2008-09-02T10:08:00.000-07:00

Tal 568 d. di C. i langobarts, che a jerin a stâ in Panonie, a decidin, ancje sburtâts di moviments di altris popui, di migrâ a ocident. A passin lis Alps e cence cjatâ grande resistence a deventin parons di grande part de Italie.

Lis migrazions dai Langobarts (imagjin di commons.wikimedia.org), duradis diviers secui, a son testemoneadis de archeologjie e dai storics latins, che a disevin che a jerin un popul piçul ma simpri pront a difindisi cu lis armis e che si veve concuistât simpri il so spazi tra chei altris popui barbars.

La situazion che a cjatin e je critiche, stant che la vuere gotiche, durade scuasit vincj agns, e à lassât dut fiscât, une vore di muarts e la tiere pustote: un tant al permet ai langobarts di imponisi cence masse sfuarç.

I langobarts a son un popul gjermanic che al à za vût contat cul imperi roman, ma che al è ancjemò tacât ae sô tradizion e duncje al è calcolât une vore barbar: a àn une struture tribâl che si fonde su lis faris, grups di fameis in parintât tra di lôr; chestis a son ancje la fonde dal implant militâr, che al rispuint plui al model dal popul armât che no a chel di un esercit professionâl. Massime la cavalarie, compagn che in altris popui gjermanics, e je une vore fuarte.

Un discut di aur dal museu archeologjic di Cividât, che al testemonee ancje il gust barbaric une vore biel dai oresins langobarts.

Une altre distinzion dai langobarts a pet de popolazion che a cjatin te lôr gnove tiere e je religjose: lis comunitâts romanis a son aromai cristianis catolichis, invezit diviers langobarts a son ancjemò pagans e altris a son cristians, ma a van daûr de dutrine di Ari, che e je diferente soredut tal pensâ che Crist al fos dome om e no ancje Diu. In realtât chestis diferencis che a son avonde piçulis a deventin impuartantis par vie che a son dopradis par discriminâ diferents sistemis di podê: di fat tai prins timps de concuiste a son discriminazions e ancje violencis.

LA ALTE ETE DI MIEÇ

2008-08-27T23:48:00.000-07:00

Su la fin dal secul V d. di C. si forme il ream ostrogotic parsore di un teritori che al cjape dentri lis regjons talianis e chês ilirichis: a mandâ i ostrogôts a controlâ cheste zone al jere stât l’Imperi roman di Orient, ma tal 535 a son propit i bizantins (Bizanzi al jere la capitâl dal Imperi di Orient) che a fasin une vuere tremende par tornâ a cjapâ la Italie. Cheste vuere e dure scuasit vincj agns e lasse dut il teritori talian intune cundizion di miserie, tant che i storics antîcs a contin che i cjamps a jerin blancs di vues. Si à simpri di tignî cont che tes vueris antighis, e dispès ancje in chês modernis, in plui dai muarts militârs e civîi in bataie e pe violence de ocupazion si veve di zontâ chei par fam e malatie: e je restade famose la preiere "A fame, peste et bello libera nos Domine" che e individue perfets chescj trê flagjei, ancje se cuntune sucession di ordin contrarie.

Il ream ostrogotic e altris reams barbarics sul tacâ dal secul VI: dai gôts si cognòs une vore ben ancje la lenghe, testemoneade te traduzion de biblie fate dal vescul Vulfila e in altris documents. La presince gotiche in Friûl e je stade avonde fuarte, ma nol è pussibil assegnâi efiets specifics te lenghe furlane, stant che tantis voltis nol è facil distingui i siei inflùs di chei Langobarts o gjermanics di altris sortis. Tal furlan di vuê a son dal sigûr peraulis di divignince gotiche e ancje toponims, tant che Gôt e Godie.

Passâts pôcs agns, tal 568, un altri popul gjermanic, chel dai langobarts, al passe lis Alps e al è in chest moment che si pues dî che in Friûl e tache pardabon la Ete di Mieç.

LA SITUAZION LINGUISTICHE

2008-08-26T04:01:00.000-07:00

Il latin fevelât in Friûl al dipent dal so centri politic e economic principâl, Aquilee, une citât cosmopolite li che a rivin inflùs mediteranis (soredut di lenghe greghe), gjermanics (a son tancj sclâfs di chês zonis o ancje militârs romans congjedâts che a vegnin des frontieris cu la Gjermanie e che duncje a puartin incà la lôr maniere di fevelâ, influençade di chês altris lenghis cognossudis), ma soredut celtics: soredut par vie che Aquilee e je nassude in tiere carniche e duncje la plui part de int e je celtiche, ma ancje par vie dai contats cu la Galie cisalpine (ven a stâi cu la Italie setentrionâl).

Cussì la lenghe fevelade e à une sô vitalitât, ancje se chê scrite e je simpri leade al model classic, e tal secul IV al sucêt alc di straordenari: tant che al conte sant Jaroni, il vescul di Aquilee Fortunazian, nassût a Cividât di une famee africane, al scrîf comentaris des scrituris sacris doprant il “sermo rusticum”, vâl a dî la lenghe fevelade de int. Magari cussì no i scrits di Fortunazian no si cognossin, ma la indicazion di sant Jaroni, che al veve studiât a Aquilee, e je sigure e e dimostre di une bande la diference gruesse tra il latin uficiâl e il latin fevelât in Friûl, che po dopo al sarès deventât un pôc a la volte il furlan; di chê altre bande e dimostre il caratar popolâr e “rustic” de glesie aquileiese.

Fortunatianus, natione Afer, Aquileiensis episcopus, imperante Constantio, in Evangelia, titulis ordinatis, brevi et rustico sermone scripsit commentarios: et in hoc habetur detestabilis, quod Liberium, Romanae urbis episcopum, pro fide ad exsilium pergentem, primus sollicitavit ac fregit, et ad subscriptionem haereseos compulit.

La notizie di sant Jaroni dal De viris illustribus

IL LÂ A MONT DAL IMPERI ROMAN

2008-08-24T23:33:00.000-07:00

Tacant dal III secul d. di C. si scjadenin tal imperi roman, massime de bande ocidentâl, ducj i elements di crisi che a jerin bielzà tal so nassi: dispès lis dominazions dai imperadôrs a tachin e a finissin cun sassinaments o vueris civîls, il sisteme economic al patìs une vore pe instabiltât politiche e militâr, la monede si svalute e la produtivitât e va al mancul, la jentrade di popolazions barbaris, cualchi volte tant che aleadis, cualchi tant che invasoris, e fâs che a sedin gruessis componentis de popolazion e dal esercit che si movin in maniere autonome, massime cuant che il podê centrâl al è debil.

Cundut che diviersis voltis imperadôrs fuarts a rivin a dreçâ almancul in alc la situazion, a man a man l’imperi roman di ocident al finìs par dividisi in zonis comandadis prime di gjenerâi e po dopo tignudis di popui barbars.

Su la fin dal secul V aromai si pues calcolâ che une unitât imperiâl ocidentâl no je plui e si fevele di reams barbars indipendents (par esempli chel dai visigôts in Spagne, chel dai francs in Galie, chel dai vandai in Afriche, chel dai ostrogôts in Italie) che dispès si formin a sparissin tal zîr di pôc timp e che in cualchi câs invezit a metin lis fondis di ce che a saran i stâts medievâi.

In cheste ete in Friûl a son dispès passaçs di esercits e bataiis ancje impuartantis: il fat principâl al è dal 452 d. di C., cuant che Atile, re dai uns, al cjape Aquilee e le bruse. Di chest moment, ancje se la citât e tornarà a nassi, e tache a pierdi a man a man la posizion di capitâl politiche e economiche dal Friûl.

Aquilee assediade di Atile intune miniature medievâl: la liende e diseve che Atile al jere li li par molâ l'assedi, pensant che i aquileiês a varessin resistût ancjemò, ma viodint i uciei de citât che a puartavin vie i lôr piçui al veve capît che al jere un segnâl che le varès cjapade e distrute. Te tradizion popolâr furlane a son ancjemò une vore di liendis su Atile.

ELEMENTS DI CRISI ECONOMICHE E POLITICHE DAL IMPERI ROMAN

2008-08-21T06:27:00.000-07:00

L’implant imperiâl roman, pûr te sô fuarce straordenarie che i à permetût di durâ cinc secui, al à dentri vie elements di pericul economic e politic che a produsin crisis e che insom a son la prime cause de sô fin.

Te economie lis grandis proprietâts, za dal prin moment tipichis dal sisteme roman, a cressin e si difondin simpri di plui: cussì a son pôcs une vore siôrs e tancj une vore puars, che ancje se in principi a jerin libars a finissin scuasi par sconfondisi cui sclâfs. In cheste maniere simpri plui int puare e lasse la campagne e migre in citât, par formâ un proletariât no produtîf che al devente un probleme sociâl e economic. Lis autoritâts a ciraran ancje di limitâ chest impuariment de campagne, leant i agricultôrs dipendents dai parons ae tiere, propit come sclâfs.

Il benstâ economic dal imperi si fonde ancje sui moviments di marcjanziis, svelts e sigûrs: lis stradis romanis a son un esempli di razionalitât e di eficience, ma fâlis e tignîlis in stât di servî al coste une vore. Tai moments di dificoltâts se e mancje la manutenzion al pues tacâ un circul viziôs: il brut stât des stradis, par vie de mancjance di bêçs, al devente un impediment pal cumierç e duncje pal recupar economic di une zone, e si puedin produsi crisis locâls.

Un toc de Vie Anie, la strade romane che e tacave Aquilee cu la planure Padane e cu la Italie centrâl, cemût che si pues viodi a Concuardie (foto di www.centrumlatinitatis.org). In Friûl cheste vie e veve dispès bisugne di manutenzion par vie che se di no e podeve finî in palût. Aancje chês altris stradis a vevin di jessi regoladis par vie dai dams dal timp.

Il control aministratîf di dutis lis provinciis e la gjestion finanziarie a domandin un numar simpri plui grant di funzionaris publics e di burocrats, che a costin al stât e che dispès a son ancje corots.

Lapide cul Edit dai presits massims dai prodots di Dioclezian, che tal 301 cun chest proviodiment al veve cirût di frenâ la crisi economiche, la svalutazion de monede e la inflazion, problemis cronics dal tart imperi roman. L'edit nol veve rivât a miorâ la situazion, anzit, salacor al à judât a fâ plui grivie la paralisi economiche (repert conservât a Berlin, imagjin di common.wikimedia.org).

La spese publiche plui grande e reste chê militâr. La difese di frontieris tant lungjis e domande un esercit professionâl cuntun grant numar di soldâts che a àn di jessi paiâts cun regolaritât par garantîsi la lôr fedeltât e che tal moment dal congjêt (daspò di almancul vincj agns di servizi) a meretin un premi gjenerôs. Cun di plui dal tierç secul indevant, a ben che a jerin stâts episodis ancje prime, al è une vore alt il presit par comprâ la aleance o almancul la pâs cui popui vicinants e par tignî in pîts une sorte di fasse di sigurece, o par paiâ tant che mercenariis tribûs barbaris interiis par che a vuardiin une trate di frontiere.

Lis spesis tal esercit, cundut che coventin par garantî la sigurece interne, a son improdutivis, gjavant dome i câs di campagnis vitoriosis che a procurin grancj botins.

Frecis romanis di Concuardie, li che al jere un grant implant di produzion di chestis armis (imagjin di www.centrumlatinitatis.org).

Un altri element di instabilitât potenziâl al divignive di diferencis culturâls, prin di dut tra doi grancj blocs dal imperi: chel ocidentâl latinizât e chel orientâl elenizât, che al leve de Grecie al Egjit e che al puartave indevant tradizions di civiltâts une vore antighis, cjaladis de bande ocidentâl cuntune fuarte amirazion, ma ancje cun suspiet.

MUDAMENTS DAL IMPLANT MILITÂR DAL IMPERI

2008-07-16T16:01:00.000-07:00

Intun prin moment l’imperi al nas cuntun so centri privilegjât, Rome cun dute la Italie, e cun teritoris sometûts, lis provinciis: dome in chês ancjemò no controladis cun sigurece o in chês che a son su frontieris pericolosis e je la presince di diviersis legjons. L’ideâl imperiâl in dut câs nol fâs finî il control di Rome dentri dai confins des provinciis, ma difûr e je une fasse di sigurece, li che i romans si sintin in dirit di intervignî, cu la fuarce militâr e cun chê diplomatiche, obleant lis popolazions barbaris a restâ in pâs cun Rome, a permeti i trafics dai romans e dispès a paiâ un tribût; cun di plui l’imperi al stice vueris tra tribûs barbaris par che no deventin masse fuartis e menaçosis.

Lant indevant cul timp lis diferencis tra Italie e provinciis a van al mancul: la citadinance romane e ven concedude simpri plui a larc, e la Italie e piert la plui part dai siei privilegjis; la situazion militâr e cambie e dilunc di dutis lis frontieris al ven tirât sù un sisteme difensîf lineâr e l’esercit al è formât di soldâts che no vegnin plui de Italie, ma propit des zonis di frontiere o di chês dongje e si doprin simpri di plui trupis no romanis, di aleâts o di mercenaris: dal tierç secul daspò di Crist a vegnin tiradis dentri fintremai tribûs interiis di barbars par che a difindin un toc di frontiere, ma cheste volte al è l’imperi che al à di paiâlis.

In realtât lis trupis, ancje cuant che a son fatis di “barbars”, a mantegnin ancjemò une grande fedeltât al ideâl dal imperi, dome che cul complicâsi e cul diferenziâsi de lôr cundizion e cu la rivalitât che e pues jessi tra i plui alts gjenerâi, al devente simpri plui dificil pai imperadôrs, massime tai moments dal cambi di podê, mantignî une politiche che e sodisfi dutis lis componentis dal esercit.

La massime espansion teritoriâl e militâr dal imperi roman, sot Traian, imperadôr dal 98 al 117 (imagjin di commons.wikimedia.org)

FUARCE E DEBILECE DAL IMPERI ROMAN

2008-07-15T13:35:00.000-07:00

La buine dade economiche e politiche tacade cul imperi di August e bute lis fondis di une struture che e à une fuarce straordenarie, chê di imponi la pâs dentri des sôs frontieris e di permeti che in cheste maniere e cressi la ricjece; di chê altre bande chest sisteme al à tes sôs fondis ancje la sô debilece istituzionâl: la concentrazion dal podê politic intune sole persone e la cussience dai militârs che la sielte di ogni gnûf imperadôr e dipint prin di dut di lôr e fâs che bielzà cui prins sucessôrs di August lis pressions dal esercit a deventin simpri plui fuarts e cu la fin di Neron si torne ai scuintris tra esercits romans logâts in regjons diferentis dal imperi e ae vuere civîl.

Elm roman dal I secul d. di C.: propit cu la seconde metât di chest secul i esercits si visin dal lôr podê di imponi il gnûf imperadôr tal moment de sucession o fintremai di sostignî un usurpadôr. (imagjin di www.museoarcheo-aquileia.it)

Cheste situazion e torne plui voltis inte storie dal imperi roman, che si niçule tra la stabilitât permetude par cualchi gjenerazion di une o di chê altre dinastie e curts moments di crisi interne une vore fuarte, li che lis legjons a lotin tra di lôr par imponi il lôr gjenerâl tant che imperadôr.

Cjâf di une statue di bronç dal III secul d. di C.: za par antîc e jere state rote vie e butade tun poç di Aquilee (imagjin di www.museoarcheo-aquileia.it). Al è une vore probabil che e rapresenti il gjenerâl Massimin il Traç, deventât imperadôr tal 235 par un colp di stât des sôs recultis che a vevin copât l'imperadôr di prime, Alessandri Sevêr.
La sô aclamazion e jere stade acetade dai pretorians a Rome e, cuintri voie, dal senât. Di fat i senatôrs a pene che a àn podût lu àn tradît e infin, tal 238, Massimin al à vût di marcjâ cu lis sôs legjons de Panonie in Italie. Par lâ a Rome si è fermât a assediâ Aquilee, che si è sierade cuintri dal imperadôr, ma li il so esercit, che nol sperave plui di cjapâ la citât, tormentât de fam e des malatiis, lu à tradît e lu à copât, cun dongje so fi. I lôr cuarps a son stâts mutilâts e cussì ancje lis lôr statuis e lis iscrizions cui lôr nons. Si conte che tal assedi propit il diu Belen al vedi protet la citât.

LIS RELIGJONS DE SALVECE

2008-07-09T22:53:00.000-07:00

Te prime ete dal imperi roman a rivin a Aquilee, tant che intune vore di altris zonis, religjons che a tachin a vê un grant atrat su la int, stant che a prometin la imortalitât.

Lis religjons origjinariis dai popui cjapâts dentri dal imperi in part a jerin sorevivudis tant che cult familiâr, in part a jerin stadis acetadis ancje te religjon uficiâl, ma in cheste maniere a podevin vê pierdût tancj caratars origjinaris e misturâsi in chel che plui che altri al jere un cerimoniâl di celebrazion dal stât roman.

Cussì par cjatâ la rispueste a domandis plui fondis simpri plui int e cjape sù religjons che a vegnin des provinciis orientâls: une di chês plui impuartantis e je chê di Mitre, diu solâr che al lote cuintri dal scûr, che si cjate tes comunitâts persianis de Asie Minôr za tal secul IV p. di C. e che si slargje tal imperi roman massime tra i soldâts e tra i marcjadants.

Calc dal rilêf di Mitre che al cope il taur, cjatât a Munistîr, che si pues viodi tal Museu Archeologjic di Aquilee (www.museoarcheo-aquileia.it)

Une altre religjon che e rive a Aquilee, salacor za tal I secul d. di C., e je chê dal cristianisim, che sul imprin si slargje tes comunitâts judeis e po dopo al ven cjapât sù ancje de popolazion no ebree, massime tes citâts.

A Aquilee a son tra i monuments cristians antîcs plui impuartants dal mont: i mosaics de basiliche.

Il plan dai mosaics de Aule Nord (cheste imagjin e chês dopo a son cjapadis di www.comune.aquileia.ud.it) che a rapresentin il viaç des animis par tornâ ae plenece di Diu. Ancje se la plui part dai mosaics di cheste aule a son stâts distruts de costruzion medievâl dal tor dal cjampanili il grant studiôs aquileiês Renato Iacumin al è rivât a cjatâ la clâf di interpretazion dai lôr simbui, e cussì ancje di chei de Aule Sud.

I mosaics de Aule Sud, che cumò si viodin ben te basiliche, che a rapresentin la concezion de salvece de Grande Glesie.

I mosaics plui antîcs, in chê che e jere la Aule Nord de basiliche e che cumò e je sot tiere, a figurin la struture dai cîi di une comunitât cristiane di gnostics. I gnostics a dan une interpretazion particolâr al cristianisim li che si messedin ancje elements de mitologjie e de filosofie classiche. A pensin che dome lis animis dai oms plui spirituâi a puedin salvâsi dopo de muart: par fâlu la anime e à di tornâ ad alt tai cîi fin te plenece di Diu, ma passant pai cîi dai planets e à di purificâsi, di pierdi la sô part plui materiâl, intant che entitâts che a corispuindin a ogni planet a cirin di fermâ il so passaç.

La zone de plenece di Diu, modificade dopo de Grande Glesie, cemût che si viôt te disposizion disiarmoniche de scrite "cyriace vibas" che in origjin e veve di jessi "cyriacoi" i oms-parons, i spirituâi che pal lôr savê a rivin ae salvece e a formin come une corone tal cjâf dal Pari (il riçot plui clâr dal cjâf dal roc, simbul de costelazion Corona Borealis).
In bande la lote dal gjal e de tartarughe e je simbul de vitorie finâl di Diu (il gjal, la lûs) sul mâl (la tartarughe, il scûr).

Il cîl des costelazions: si puedin viodi dal bas ad alt tes crôs staronzadis Capricorni (la Cjavre Amaltee che e veve salvât Zeus, duncje simbul ancje di Moisès salvât de aghe), Taur (cu lis siet pernîs che a valin pes stelis des Pleiadis, che a fasin part dal Taur, simbul ancje di Melchisedec), Gjambar (cun parsore une torpedin, simbul ancje di Josuè che al veve fermât il soreli), Drâc (trasformât po dopo in cjavret de Grande Glesie): in bande di chestis figuris si pues viodi che lis animis, i uciei, a son bessolis, a àn za pierdût la lôr part plui negative.

I cîi dai planets cemût che si viodin figurâts te Aule Nord: la sucession dal bas al alt, ispirade dal test gnostic Pistis Sophia e je: Zeus-Jupitar (cjaval di fûc), Afrodite-Venus (mus neri), Ermes-Mercuri-Ecate (animâl cun trê cjâfs, ruvinât dal tor), Ares-Mart (bec cui simbui de vuere), Cronos-Saturni (torel cul falcet): In bande di ogni planet si pues viodi che a son cubiis di uciei, che a son il simbul de anime ancjemò no purificade, fate de sô part plui buine e di chê plui triste.

La corint cristiane gnostiche e je une vore elitarie, pal solit i gnostics a son une vore siôrs e a son ancje avonde pôcs: stant che a pensin che dome lôr, che a son i spirituâi, si salvaran no cirin nancje di convertî gnove int.

La interpretazion gnostiche tal III secul d. di C. e va al mancul e ancje i siei mosaics a vegnin cjapâts de comunitât che za dal imprin e veve di jessi chê plui impuartante: la grande glesie aquileiese.

La grande glesie aquileiese e je une des primis dal Mediterani: e ricognòs la sô fondazion di bande di sant Marc, midiant dai sants Ermacore e Fortunât e tai prins timps je une vore leade a chê di Alessandrie di Egjit.

I ponts plui fuarts dal cristianisim aquileiês a son la acetazion de origjin judaiche e duncje il spirt di tolerance e di amistât cui ebreus, la crodince de salvece par ducj (in chest element, alore, propit il contrari dai gnostics), ancje pai no cristians, il svant di jessi une glesie rustiche, dongje de int e lontane dai compromès cul podê politic.

Il mosaic di chê che e jere la Aule Sud e che cumò si viôt dentri de basiliche di Aquilee al è une rapresentazion straordenarie de cheste dotrine.

La part plui orientâl de Aule Sud, chê che si viôt te Basiliche, cu la storie dal profete Jone glotût dal mostri marin e tornât a butâ fûr dopo trê dîs su la rive di Ninive, a predicjâ la salvece ai forescj. Al è simbul de resurezion di Crist e ancje promesse di salvece par ducj.

Simpri de Aule Sud, i animâi che a muerin e chei che si salvin: si pues viodi che ducj a tornin ancje te figure a diestre, e fintremai chel plui impûr di ducj daûr de Biblie, il jeur, al è in doi esemplârs, il mascli e la mascje. Te realizazion stilizade des figuris si pues notâ la cure tal segnâ lis çatis, che pe Biblie a jerin un dai detais plui impuartants par definî se un animâl al jere pûr o impûr. Ancje chi alore si à la rapresentazion de salvece par ducj, no dome par chei che a ubidivin ae glesie: chest pont al veve efiets politics une vore impuartants, stant che al faseve de glesie une comunitât di personis che a devin graciis a Diu, e no un centri di podê e di control de vite publiche.

La stele di Davide e jere propit sul passaç par jentrâ te Aule Sud de Basiliche, segnant la continuitât tra judaisim e cristianisim.

La interpretazion aquileiese dal vanzeli e rive a passâ tant che uficiâl te glesie catoliche dome dopo di contesis teologjichis une vore fuartis, ma te pratiche la glesie di Rome no acete i siei ponts fondamentâi e za dal IV secul e je leade a strent cul podê politic.

IL FRIÛL TRA LA FIN DE REPUBLICHE E L’INIZI DAL IMPERI ROMAN

2008-07-08T08:40:00.000-07:00

La planure padane e jere za dal II secul p. di C. zone di influence romane, cun fondazions di coloniis e tratâts di aleance. Tal 81 il ditatôr Luci Corneli Sile, par che no sucedessin rivoltis tant che chês dal 91 tra i aleâts, le veve trasformade in provincie, cul non di Galie Cisalpine, cundut che lis coloniis che a vevin vude concedude la citadinance romane a podevin mantignîle: tra chestis e jere ancje Aquilee.

Dilunc de ete des vueris civîls Aquilee e reste ancjemò une volte avonde cuiete e no patìs dams dai grancj savoltaments, ancje se aromai e je un centri impuartant: tai agns cinquante Cesar al è dispès a Aquilee par passâ l’Invier cu lis legjons, che al comande pe concuiste di dute la Galie (in gjenerâl par antîc si puartave indevant lis operazions di vuere scuasi dome cu la biele stagjon).

Al è in cheste ete che ancje Cividât e Zui a deventin municipis autonoms e a puartaran il non di Juli Cesar: i nons latins di chestis dôs vilis a son Forum Iulii e Iulium Carnicum. Tal 42 p. di C. ancje Concuardie e rive ae cundizion di municipi.

Reperts romans dal Palaç Municipâl di Concuardie (imagjin di www.comune.concordiasagittaria.ve.it)

Tal stes an la Galie Cisalpine no je plui provincie, ma e passe a jessi part de Italie, dividude in cuatri regjons: chê plui grande e je la Venetia et Histria e Aquilee e je la sô citât plui impuartante.

La Regjon Decime de Italie sot August (imagjin di www.comune.concordiasagittaria.ve.it)

Cu la fin dal I secul p. di C. e tache la dade di timp plui positive pe economie aquieliese antighe: il mâr Mediterani al devente dut roman e duncje i ven imponude une pâs che e jude i moviments e il cumierç, lis frontieris, che prime a jerin ancje un pericul, si slontanin a Nord e a Est par vie de espansion dal Imperi, si disvilupe une rêt di stradis sveltis e siguris: in chest moment Aquilee e je la seconde citât plui impuartante in Italie dopo di Rome e e je tal centri di cumierçs e comunicazions che no dome a fasin ben ae economie, ma che ancje a puartin dongje tantis comunitâts diviersis di lenghe, di culture, di religjon.

LA FIN DE REPUBLICHE E LA NASSITE DAL IMPERI ROMAN

2008-07-08T08:12:00.000-07:00

Dilunc dal ultin secul prin di Crist e je la lungje muart de republiche romane: e je une serie une vore lungje di vueris internis, determinadis de cressite straordenarie dai dominis romans e de contese par controlâju, des injustiziis dal sisteme politic e sociâl e de incapacitât des classis sioris di tignî sù un sisteme stabil. Di une bande no je scuasit nissune concession pe condivision dal podê cu lis classis plui bassis (cence calcolâ il tratament inuman di centenârs di miârs di sclâfs) e cui popui sometûts, di chê altre bande e je la grande ambizion di singulis personalitâts che a cirin il podê assolût.

Cun dut achel lis rivoltis di aleâts, di sclâfs, lis violencis leadis ae concuiste dal podê e fintremai lis vueris civîls no fermin la espansion teritoriâl dai dominis romans, stant che, in paralêl cui scuintris internis,i consui e i ex consui a comandin simpri i lôr esercits cuintri di tieris forestis (Bitinie, Sirie, Galie) par fâ cressi il lôr podê.

Tal 49 Gai Juli Cesar al rive a otignî il podê assolût dopo de vuere civîl cuintri di Gneu Pompeu, ma tal 44 al ven sassinât di une conzure di altris politics romans: in ogni câs la conferme che Rome e à di deventâ une monarchie e rive tai agns daspò, cun altris vueris civîls e cu la vitorie finâl di Otavian, tal 31 p. di C.: di chel moment il guvier al ven tignût dal imperadôr e dai funzionaris che lui al sielç.

Statue di Cesar, protagonist tes vueris civîls che a àn puartât ae fin de republiche e des vuersi di concuiste che a àn slargjât il domini roman in Galie. Cheste statue, in place a Cividât, no je un origjinâl roman, ma une opare moderne, ispirade dal nazionalisim talian che al à doprât la storie romane pe sô propagande (imagjin di commons.wikimedia.org).

RELIGJONS PECRISTIANIS A AQUILEE

2008-06-30T04:09:00.000-07:00

Pal solit i romans no àn une ande repressive ni cu lis lenghis ni cu lis religjons che a cjatin, fintremai che no son une menace pal stât. A Aquilee a àn puartât la religjon tradizionâl romane, fondade sul cult di Jupitar, Junon e Minerve, e li che a àn une vore di impuartance ancje Mart e Ercul e altris divinitâts. Cun di plui al è une vore fuart il cult dai muarts de famee. Ma il diu plui venerât a Aquilee nol è roman tradizionâl, ma ben celtic: al è Belen, diu dal soreli e de medisine, che i romans a àn cjapât sù dai celtis carnis e che a tegnin di protetôr de citât.

Epigrafe a Belen cjatade a Aquilee: il cult roman par cheste divinitât celtiche, che in cheste iscrizion e je identificade cun devant il non classic "Apol" e cun chel carnic "Belen", al jentre tal fenomen tipic dal sincretisim, vâl a dî de disposizion a messedâ lis religjons e di acetâ lis divinitâts di chei altris popui zontantlis a chês tradizionâls.

In bande de relgjon uficiâl a son lis religjons dai imigrâts (par esempli judeus, egjizians, africans e v.i.).

LA LENGHE LATINE

2008-06-26T14:53:00.000-07:00

La colonizazion romane in Friûl e à, compagn che in tante part de Europe, une impuartance fondamentâl te storie linguistiche: di chel moment in Friûl si tache a fevelâ une lenghe latine.

Il latin fevelât de int al è un pôc diviers di chel scrit, che al è avonde regolâr e cristalizât: il fat che al tachi a jessi fevelât in ducj i teritoris sot de influence di Rome e di tante int che no jere di marilenghe, al fâs che in ogni zone si lu feveli intun mût diviers, che al va daûr des lenghis dai popui di prime: par cualchi aspiet e je dome cuistion di acent, par cualchi altri (e simpri di plui lant indevant cul timp) a son pardabon trasformazions di suns, di struturis gramaticâls, di significât des peraulis, di costruzion des frasis.

Cun di plui la espansion dal latin e va indevant secui e intant la lenghe e cambie: lis primis zonis concuistadis a cognossin un latin arcaic, lis ultimis dome un plui gnûf.

Dutis lis varietâts dal latin a puedin ancje influençâsi tra di lôr: la presince di citâts cuntune economie vive, di stradis ben tignudis o di liniis comerciâls par tiere o par aghe a puedin fâ viazâ ancje elements linguistics dentri di ciertis zonis ben colegadis. Po dopo, massime dopo de fin dal imperi roman tal V secul d. di C., la jentrade impuartante di diferents popui no latins, e nancje latinizâts (par esempli gjermanics, slâfs, araps...), e divît ancjemò di plui lis tessaris dal mosaic neolatin.

Mape des varietâts neolatinis vuê in Europe (di commons.wikimedia.com).

IL FRIÛL E LA AMINISTRAZION ROMANE

2008-06-23T05:48:00.000-07:00

Tal 181 p. di C. lis operazions pe fondazion di Aquilee a son puartadis indevant di une comission di trê triumvirs: Publi Sipion Nasiche, Gai Flamini e Luci Manli Acidin, che a segnin lis liniis des stradis, a organizin i lavôrs di costruzion e a assegnin lis tieris.

Par desenis di agns , e anzit par secui, la costruzion e il mantigniment des stradis a son stâts ativitâts un grum impuartantis, che a garantivin la dinamicitât de economie dal Friûl inte republiche e po dopo tal imperi roman. Dispès lis grandis stradis a levin parsore di percors za preistorics e protostoriscs, e tantis voltis ancjemò lis stradis di viis di comunicazion di vuê a van daûr de stesse linie (imagjin di www.itcmarchetti.net).

Aquilee e je il centri di podê no dome su la campagne tor ator, ma ancje di ducj i paîs (vici) de zone, cul timp ancje su chei dal Cjars e de Istrie.

Tal 89 p. di C. i aquileiês a àn ancje la concession de citadinance romane, in premi par no vê combatût cuintri di Rome te vuere sociâl, e uns cuarante agns dopo altris trê centris dal Friûl a cjapin simpri plui impuartance: a son Concuardie, Zui e Cividât, che a passin di vici de campagne aquileiese a municipia: ur ven ricognossude la cundizion di citâts autonomis.

Il forum di Zui

La forme aministrative e somee avonde chê di Rome: lis autoritâts plui altis de citât a son i duumvirs, che a corispuindin in piçul ai doi consui, che a àn dongje di lôr la curie, che e je un consei che al corispuint in piçul al senât.

AQUILEE TE SUAZE DAL DOMINI ROMAN

2008-06-22T23:37:00.000-07:00

In Friûl i elements di pericul sociâl, une vore fuarts in Italie, a son plui debii.

Tal moment de fondazion, in senât si resone se la gnove citât di Aquilee e vedi di jessi une colonie romane o une colonie latine: il fat che e sedi dongje dal mâr e intun pont strategjic une vore impuartant al pues fâ sielzi il dirit roman, par che Rome e puedi controlâle in maniere direte; di chê altre bande se e e ves di jessi une colonie romane al sarès dificil aministrâle ben, par vie che e je une vore lontane e pe stesse reson i siei citadins no podaressin esercitâ ben i lôr dirits politics, stant che par votâ o par fâsi votâ si scuen lâ par fuarce fin a Rome. Duncje si sielç che Aquilee e sedi une colonie di dirit latin: la decision e je razionâl e si juste ben su lus dibisugnis de zone.

Il forum di Aquilee: al jere la place principâl, il centri de vite comerciâl, juridiche e politiche de colonie.

Cun di plui in Friûl a son fatis assegnazions personâls di tieris (sui 17 etars par ogni soldâts, sui 33 par ogni centurion, sui 47 par ogni cavalîrs) ben distribuidis e une vore gjenerosis e no si lassse il teritori tant che ben public permetint che i plui fuarts e plui prepotents si insiorin parant vie i plui puars.

In Italie centrâl o meridionâl il fat di jessi citadins latins o aleâts italics sometûts al podeve jessi une discriminazion a favôr dai romans tal sfrutament des risorsis dal teritori e ancjemò di plui tes ativitâts tes provinciis concuistadis: lis societâts di publicans romans e il stât roman a otegnin in cheste maniere ricjecis di no dî e invezit pôc o nuie ur tocje a Latins e a Italics, cundut che ancje lôr a àn vût di combati tes vueris di concuiste.

Denari italic dai popui aleâts che si son rivoltâts cuintri di Rome te vuere sociâl (dal 90 al 88 p. di C.). Si pues lei ancje la leiende "ITALIA" in oposizion al domini di Rome.

A Aquilee invezit, dopo dai prins agns di grandis fadiis pe fondazion e pal implant di culturis, e je la prospetive di fâ rindi un teritori che fintremai in chel moment al è stât lassât salvadi e il cumierç che al rive di Nord e di Est (ambre, piels, sclâfs e metai) di Sud e di Ovest (tiessûts, aliments, vin, vueli, prodots artesanâi) a sburtin avonde la economie.

Anforis romanis come chestis (che però a son dal II o III secul d. di C.) cjatadis tal mâr di Grau, al testemonein i trfics comerciâi che a fasevin di Aquilee une citât une vore siore. (foto di www.grado-online.net)

Par chest, cuant che a vegnin vueris civîls in Italie par otignî la citadinance romane par ducj i italics (90-88 p. di C.) o tra personalitâts politichis che a volevin il podê assolût (massime tal 49-44 p. di C. tra Cesar e Pompeu, e tal 31 p. di C. tra Otavian e Marcantoni), i aquileiês no àn interès a jentrâ masse tes contesis e a àn pôcs o nissun dam di chei acjadiments.

LA STRUTURE POLITICHE E SOCIÂL ROMANE

2008-06-12T14:15:00.000-07:00

LIS ISTITUZIONS INTERNIS

La liende e conte che Rome e nas tal 753 p. di C. (ma a son ancje altris datis daûr di altris tradizions) tant che monarchie, che e dure scuasi doi secui e mieç cuntune sucession di siet rês, e che tal 509 p. di C. il sisteme al ven voltât in republiche. Te republiche la autoritât plui alte, ancje militâr, e je tignude dai doi consui, che si elein ogni an: ducj i oms romans, patrizis (i aristocratics) e plebeus, a puedin votâ, cuntun sisteme che al jere fondât su la struture dal esercit, ma a puedin jessi elets dome i patrizis e cun di plui ancje il pês dai vôts al è sproporzionât: chel dai siôrs al conte une vore di plui di chel dai puars. I consui a àn in bande un consei, il senât, formât di anzians e di cui che al à za vude une incarghe publiche avonde alte tai agns prime. In câs di pericul une vore fuart i doi consui a nomenin un unic ditatôr par sîs mês e a deventin siei subordenâts.

Il forum di Rome, centri de vite politiche, judiziarie e econemiche romane: pe sô impuartance al à vût une vore di intervents in timps diferents e vuê il so aspiet al pues someâ caotic al visitadôr inespert.

Dal 367 p. di C., daûr di scuintris internis par vê riformis, si acete che ancje i plebeus a puedin jessi elets consui; cun di plui e nas la figure dai pretôrs, che a direzin la ativitât judiziarie par un an e che in timp di vuere a puedin ancje comandâ un esercit, e chê dai censôrs, doi elets ogni cinc agns, che a àn di tignî lis listis dai citadins dividûts in cens daûr de lôr ricjece e ancje di fâ la liste dai senatôrs.

Statue di bronç di Lucius Iunius Brutus, un dai doi prins consui de republiche di Rome, tai Museus Capitolins di Rome.

Po dopo a son ancje lis incarghis dai tribuns de plebe, che in teorie al à di garantî i dirits dai plui puars e che a àn dirit di veto su lis propuestis di leçs, dai cuestôrs, che a judin consui e pretôrs soredut te aministrazion economiche, dai edîi, che a viodin de manutenzion des costruzions publichis, des stradis e che a organizin i spetacui e lis fiestis.

I spetacui publics a jerin une manifestazion impuartante de societât romane. In chestis lums dal museu di Aquilee (www.museoarcheo-aquileia.it) si pues viodi figurâts trê esemplis: il combatiment tra gladiatôrs, la mascare di teatri e il cjar pes garis tal circ.

Cui che al è stât consul o pretôr, finît il mandât, in plui di jentrâ tal senât al pues vê il comant suntune provincie, ven a stâi suntune tiere concuistade ai nemîs e sometude al podê dal stât: cuant che il Friûl al finìs sot de influence romane lis provinciis a son la Sicilie, la Sardegne e la Corsiche, la Spagne citeriôr (lis zonis iberichis a Nordest), la Spagne ulteriôr (lis zonis iberichis a Sud). Daspò dal 150 p. di C. si zontin ancje la provincie di Macedonie (che e veve sot ancje la Grecie) e chê di Afriche (che e jere formade di une part dai dominis di Cartagjin, aromai cjapade e sdrumade).

Dut il teritori tra lis Alps e il flum Rubicon al è stât provincie par nancje mieç secul, dal 81 p. di C. al 42 p. di C.: in cheste dade di timp Aquilee e je ancje une des citâts che a podevin fâ di centri di podê de provincie.

Tal 42 p. di C. la provincie de Galie Cisalpine e je abolide e si fisse che i confins de Italie a rivin fin aes Alps.

Tes provinciis al è une vore facil che, pe coruzion des autoritâts, si lassi libaris di cualsisei abûs compagniis di privâts (i publicans) che a àn di fâ oparis publichis e soredut di tirâ i tribûts.

LA SOCIETÂT

La societât romane, in origjin fate di pastôrs e di contadins e a man a man disvilupade in societât urbane, ancje cun artesans specializâts e marcjadants, e e je une vore militarizade: za dal imprin Rome e à vût di frontâ une vuere daûr di chê altre cun ducj i siei vicinants: prime i Latins e i Etruscs, po dopo altris popui italics, i Celtis e i Grêcs des coloniis talianis, i Cartagjinês e v.i..

In cheste situazion l’esercit al è formât dai citadins, che a àn il dovê di combati par difindi e par slargjâ il podê di Rome. Tal esercit roman la division jerarchiche e va daûr de ricjece: sul imprin i citadins a àn di lâ in vuere paiant il lôr armament, duncje cui che al è masse puar nol ven nancje ingaiât, lis fassis bassis a puedin permetisi dome armis lizeris, invezit cui che al è des fassis altis al à avonde bêçs di comprâ un armament complet e di mantignî cjavai e servidôrs. Te societât e te politiche e vâl cheste stesse division.

Cuant che Rome e tache a slargjâ simpri di plui i siei dominis e ven fate une leç che e impon ai senatôrs, duncje ai politics, di vê di risorsis dome lis ativitâts tradizionâls che a derivin des grandis proprietâts di tieris. Cui che invezit al vûl investî bêçs tal cumierç o tai apalts publics nol pues cjapâ la strade de politiche, ma al fâs simpri part des fassis altis de societât e al pues vuadagnâ ricjecis di no dî: cheste classe e je chê dai cavalîrs, che si clamin cussì par vie che daûr de vecje division dal esercit a podaressin permetisi di lâ in vuere in cavalarie.

Nâf comerciâl di une sculture di Aquilee: il cumierç, dongje de vuere e de produzion agricule e de manifature fate pal plui di sclâfs, al jere un dai pilastris de economie romane.

Lis cundizions dai piçui proprietaris e dai contadins a son dispès menaçadis: a ben che cu lis vitoriis militârs e cul botin ancje i puars a puedin vê un vantaç, dispès al capite il contrari, parcè che stant lontans pai mês che e durave la vuere lis ativitâts di contadins e di artesans si fermin e dispès tornant a cjase si cjatin in miserie e a scuegin vendi chel pôc che ur vanze ai citadins plui siôrs.

Lis tieris concuistadis pe plui part a son tignudis tant che ben public: in teorie ducj i citadins romans a puedin doprâlis, ma te pratiche lu fasin dome chei plui siôrs, che pal lôr interès a parin vie i puars ancje cu la fuarce.

Une soluzion pai puars e pues jessi chê di jentrâ sot de protezion di une famee siore e di lavorâ sot paron, ma ancje chest al devente dificil pai citadins libars, par vie che cu lis vitoriis militârs i presonîrs a deventin sclâfs e pai grancj possidents al è une vore plui convenient fâ lavorâ chei che no un citadin cun ducj i siei dirits.

In cheste situazion al è naturâl che a sedin scuintris e che si sedi simpri plui a pericul di vueris civîls.

I RAPUARTS CUN CHEI ALTRIS POPUI

Cemût che si è viodût i romans a àn vût di lotâ cui convicins, vincint scuasit simpri, o rivant a ripiâsi une vore svelts daspò di cualchi vitorie dai nemîs. I popui batûts a vegnin sterminâts dome di râr: pal solit a àn di paiâ dams di vuere une vore alts, lassâ a Rome un cuart o un tierç des lôr tieris, e impegnâsi in tratâts di aleance, prometint di judâ in câs di altris vueris.

Vuerîrs dal popul italic dai Sanits, che al veve impegnât une vore Rome in plui vueris.

La potence di Rome in ogni câs e finìs par pesâ ancje su chei popui che no i àn mai fat cuintri e che a son siei aleâts: vincint lis vueris e cres la fuarce di Rome e i aleâts a finissin par acetâ tratâts, diviers câs par câs, che ju cjapin a plen sot de influence di Rome e che ur lassin dome une piçule autonomie.

Tra i prins popui passâts par chest procès a son i Latins, che a vevin formade une leghe par tignî bot cuintri di altris popolazions: sul imprin dal secul V p. di C. ancje Rome e jentre inte Leghe Latine e e devente la citât plui potente, imponintsi su chês altris. La aleance tra Latins e je une vore strete e e forme une cierte unitât politiche: par esempli se un latin al va a stâ di une citât a di une altre o se al maride une femine di une altre citât latine al ven ricognossût tant che citadin e nol è calcolât un forest.

Tal fondâ coloniis, ven a stâi citâts gnovis, Rome e à la pussibilitât di dâur il dirit roman o chel latin: tal prin câs la gnove citât e je dutun cun Rome, tal secont e je leade a Rome cui stes pats dai popui Latins e e à une cierte autonomie.

Sul imprin i aquileiês a vevin i stes dirits dai latins. Cul timp a varan la citadinance romane, che e sarà slargjade prime a dute la Italie e po dopo a dut l'imperi. (te imagjin statuis dal monument funerari di un om e di une femine di Aquilee, foto di www.museoarcheo-aquileia.it)

Tal slargjâsi dal domini di Rome ancje chestis diferencis tra citadins romans, latins e italics sometûts cun tratâts diferents a àn di dâ tensions e a puartin a scuintris internis: tal I secul p. di C., par vie di problematichis sociâls e de grande cressite teritoriâl e economiche di Rome che e à di controlâ grancj dominis, si rive a vueris civîls e ae trasformazion di republiche in imperi.

LA ROMANIZAZION

2008-06-11T16:23:00.000-07:00

Su la fin dal tierç secul prin di Crist il podê di Rome si slargje su dute la Italie centrâl e meridionâl, cuntun complès sisteme di aleancis cun popui amîs, di aleancis imponudis a popui batûts e di dominis direts di tieris concuistadis.

Rome e à diviers interès: slargjâsi a Nord, te planure padane, li che a son tribûs celtichis e liguris, cu la scuse che a menacin lis frontieris cun pericolosis incursions, concuistant cussì tiere gnove e une vore produtive; tignî controlât l’Adriatic, li che e je une vore fuarte la piratarie dai Istris; frontâ cun fuarce la concorence di Cartagjin intal Mediterani ocidentâl.

Il sucès de espansion romane al è il risultât di un complès di carateristichis de organizazion di cheste societât: il militarisim, la capacitât diplomatiche di sumission e di integrazion progressive dai popui e dai teritoris consuistâts, la canalizazion des tensions internis cuintri dai nemîs esternis, la fuarce de aristocrazie, ancje prepotente ma eficiente e flessibile, che e permet a Rome di ripiâsi ancje dopo di crisis internis o di grandis disfatis militârs, la mancjance di organizazion de plui part dai aversaris dai romans, gjavant Cartagjin.

Lis grandis impresis militârs di Anibal, gjenerâl e politic cartagjinês, te II vuere puniche (218-202 p. di C.) a vevin fermât la espansion romane a Nord, ma dopo di chê vuere la espansion e torne a tacâ, ancje cu la fondazion di Aquilee.

In cheste suaze al è un prin contat de potence di Rome cul teritori furlan: tal 221 e je une gruesse operazion militâr romane cuintri dai Istris e lis armadis salacor a passin pe Basse. No si sa che al sedi stât nissun scuintri cui Carnis e a son storics che a pensin che za in chel moment a sedin stâts fats, o imponûts, tratâts di aleance tra Romans e i Carnis che a vivevin di ca des Alps.

Tal 183 p. di C. il senât roman al decît di fondâ la colonie latine di Aquilee: un tant al jentre tal plan di espansion par dâ supuart ai interès romans tal alt Adriatic, che al è impuartant tant che pont comerciâl e strategjic. Une colonie in cheste zone e pues coventâ ancje pe future espansion romane te penisule balcaniche, cuintri dai Ilîrs e viers de Macedonie e de Grecie.

Monument funerari di un militâr a Aquilee (www.museoarcheo-aquileia.it): i prins colons a jerin incuadrâts tal esercit e ancje cul passâ dai secui la presince dai militârs romans in Friûl, in servizi o dopo de fin dal servizi, e je restade impuartante.

Cundut che la decision de fondazion e je dal 183 p. di C. la colonie di Aquilee e nas dome tal 181: a son coventâts doi agns par tirâ dongje, un pôc di dute Italie, 3.000 fameis che a acetin di lâ tant lontan a fâ sù une citât, intune zone che e je calcolade une frontiere pricolose e inospitâl. Par convinci i colons a movisi si ur da une cuantitât di tiere che e je il dopli rispiet a altris coloniis de stesse ete, ma dome dodis agns dopo al covente in ogni câs mandâ altris 1.500 fameis, par vie che tantis di chês de prime fondazion a son tornadis indaûr.

Une iscrizion tune piere, forsit la base di une statue, in onôr di un dai trê magjistrâts che a vevin viodût de fondazion di Aquilee e in bande un rilêf cu la cerimonie de fondazion cuant che si segnave cuntune pline e une vuarzine i limits de colonie. (www.museoarcheo-aquileia.it)

In chel moment il Friûl al è ancjemò une tiere pe plui part boschive cun piçui centris celtics: la Basse e je cuvierte di palûts e de grande Silva Lupanica, il Bosc dai Lôfs.

De Silva Lupanica antighe a son restâts te Basse furlane dome che pôcs vanzums, come chest de foto in comun di Cjarlins (www.comune.carlino.ud.it), pal rest la planure e je stade trasformade intune taviele di cjamps che dispès ancjemò vuê a van daûr de division teritoriâl romane.

Cu la fondazion di Aquilee al è un cambi une vore fuart, stant che il Friûl al jentre ad in plen tal sisteme roman: e je une cressite economiche e demografiche straordenarie, une grande part de planure e di chês altris tieris plui buinis a son disboscadis par fâ spazi al gnûf model agricul, che al tint no dome ae coltivazion di ce che al covente pes dibisugnis dal puest, ma ben a produsi une vore pe esportazion, plui di dut di vin. Un tant al puarte a di un sfrutament planificât de tiere, che si oten soredut in gracie dal lavôr dai sclâfs, che i romans a podevin comprâ e che plui di dut si procuravin cui nemîs vinçûts in vuere.

Pe prime volte te storie, in Friûl e je pardabon une citât, Aquilee, che a man a man e devente une metropoli: il disvilup dai dominis romans i da une posizion centrâl tai scambis tra Nord e Sud e Est e Ovest. Dal Nord e dal Est a rivin soredut sclâfs, piels e la robe plui preziose: la ambre.

Ambris aquileiesis, si puedin ancje viodi lis fueis che si devisi pal an gnûf, tant che regâl di bon auguri (www.museoarcheo-aquileia.it)

Aquilee e je un dai centris plui impuartants di lavorazion di cheste piere preziose in dut il mont roman e di chi la ambre e passe par rispuindi a une domande un grum fuarte in ducj i marcjâts. A Ovest si vierzin stradis pe Italie setentrionâl e a Sud e je la vie di comunicazion plui svelte: il mâr Adriatic che al met in contat cu lis cuestis de Italie, de Penisule Balcaniche fin in Grecie, dal Mediterani orientâl e dal Egjit.

Il puart di Aquilee: chi a passavin marcjanziis che a rivavin di lontan, sedi de Europe centrâl al Mediterani che dal Mediterani bande Nord e bande Ovest (foto di www.museoarcheo-aquileia.it)

I CELTIS CARNIS

2008-06-06T03:26:00.000-07:00

Daspò dal V secul p. di C. si cjate il prin popul che o savìn di sigûr che al à vivût in maniere fisse in Friûl e che si pues dâi un non definît: al è chel dai Carnis.

I Carnis a son une tribù dai Celtis e a àn lassât il lôr non a trê zonis di monts des Alps orientâls: la Cjargne, la Carinzie, il Cragn.

Monedis carnichis

Te Ete dal Fier i Celtis a son un grup di tribûs indoeuropeanis che si slargjin fintremai a cuvierzi une grande part de Europe (lis isulis Britanichis, la part setentrionâl e ocidentâl de penisule iberiche, une buine part di chê che vuê e je la France, la Belgjiche, la part plui ocidentâl e meridionâl de Gjermanie, une buine part de Italie setentrionâl e de Svuizare) fasint incursions ancje plui lontan (fintremai a Rome, che a brusin tal 390 p. di C., lant indevant fin in Sicilie; te penisule balcaniche e in Anatolie, li che un grup si ferme ancje a vivi te regjon de Galazie).

Teritoris li che e je stade une presince impuartante di insediaments celtics

Cun dut achel i Celtis no formin mai un imperi: lis tribûs a son guviernadis di une classe aristocratiche di vuerîrs, che pal solit a elein il lôr re.

A àn une classe sacerdotâl, i Druidis, che e ten une cognossince une vore fonde di astronomie, matematiche, medisine e di ogni altre dissipline: dutis chestis cognossincis a son mandadis a memorie, stant che pal solit i Celtis no doprin la scriture.

I grêcs e i romans a contin che i Celtis a adorin diviers dius e che a pensin che la anime e sorevivi dopo de muart dal cuarp e che e ledi indevant in gnovis vitis.

L'ipogjeu celtic di Cividât al è un sît ancjemò misteriôs: si lu interprete tant che lûc di cult o di sepulture di ete celtiche, ma in realtât no son masse sigurecis su la sô datazion e su la sô funzion. (imagjins di www.museiprovinciaud.it)

La divinitât celtiche plui venerade in Friûl al è Belen, il diu dal soreli e de medisine, che po dopo al ven acetât tant che protetôr ancje dai colons latins di Aquilee.

Statuutis che daûr di cualchi studiôs a podaressin figurâ Belen, cundut che a podaressin jessi ancje di Ercul.

La lenghe celtiche dai Carnis, e dai Celtis antîcs in gjenerâl, no je tant cognossude, massime pal fat che no scrivevin scuasi mai e che par vie de espansion dai romans a àn finît par doprâ il latin.

Tal furlan a son restadis pocjis peraulis celtichis (par esempli baraç, broili, glasine, troi...), invezit a son propit une vore i toponinms, ma soredut l’acent carnic al à di jessi stât fondamentâl pe deformazion dal latin e pe formazion dal furlan.

Te seconde metât dal prin mileni p. di C. e tache la espansion di Rome, che cuntune schirie cence fin di vueris e cjape il domini su la Italie centrâl e meridionâl, e fintremai e vinç il confront cun Cartagjin pe egjemonie sul Mediterani ocidentâl e su lis cuestis iberichis.

Sintesi de espansion dal domini roman, sucedude cun vueris e aleancis.

In Grecie si disvilupin lis poleis, lis citâts stât, che a rivin a tignî cuintri dal imperi persian (cui fats di vuere plui famôs tal 490 e tal 480 p. di C.), che al cjape dentri za dute la Mesopotamie e la Anatolie, ma po dopo si vuastin tes lotis tra di lôr (prin di dut jenfri Atene e Sparte, in plui fasis tra il 431 e il 404 p. di C.). Te seconde metât dal cuart secul la monarchie de Macedonie, che prime e jere une zone periferiche de Grecie, calcolade semibarbare, e rive a imponisi e cun Alessandri il Grant e concuiste fintremai dut l’imperi persian.

LA ETE DAL FIER

2008-06-05T05:18:00.000-07:00

Sul finî dal secont mileni prin di Crist e tache une gnove ete, chê dal fier: si impare a lavorâ chest metal, cundut che naturalmentri si doprin ancjemò imprescj di altris materiâi, e si puedin fâ armis ancjemò plui fuartis: sul tacâ di cheste ete a son testemoneadis migrazions di popui che a savoltin lis grandis civiltâts dal Mediterani Orientâl, de Mesopotamie e dal Egjit.

Reperts de Ete dal Fier (dôs manariis, une sesule, dôs fibulis e un braçâl) dal Museu dal Borc dal Cjistiel di Gurize (www.sirpac-fvg.org)

Il Friûl, tant che il rest de Europe, al cognòs chest disvilup tecnologjic e sociâl: i cjastelîrs de ete dal bronç dispès no son plui abitâts, forsit ancje par vie di mudaments climatics, ma a son simpri plui reperts, che a testemonein ancje la continuitât di scambis cun teritoris dongje e cun paîs plui lontans.

Te prime fase de ete dal fier al è dificil dî cuale che e sedi la popolazion che e vîf in Friûl: si sa che a ocident al è il popul indoeuropean dai Venits, che al à une sô culture ben disvilupade ancje cun citâts (massime Atest) e che al à une lenghe imparintade cun chês italichis, testemoneade ancje in iscrizions.

Mape dai sîts li che si à cjatât iscrizions venetichis (segnâts cun triangui): la lôr distribuzion e fâs pensâ che in Friûl i Venits no vessin nissun insediament impuartant.
(Mape di Venetic inscriptions index)

A orient si cjatin i Istris e i Ilîrs, altris popolazions indoeuropeanis, e di gnûf a son testemoneancis di une cierte presince di Venits, come ancje in Carinzie: in dut câs in Friûl a mancjin testemoneancis siguris che a fasin pensâ a une presince massive e stanziâl di un di chescj popui, a ben che dal sigûr a son moviments di piçui grups e contats comerciâi e culturâi.

In cheste ete e je la flôr de civiltât etrusche che si slargje de Toscane intes zonis dongje; tal mediterani i grêcs e i fenicis a tiessin une grande rêt comerciâl e a man a man a tachin a fondâ cetantis coloniis su dutis lis cuestis: in cheste maniere a determinin ancje la grande cressite socioculturâl des popolazions che a àn contat cun lôr, massime in Italie e te part meridionâl de penisule iberiche. Dal 753 e je la date mitiche de fondazion di Rome.

La espansion dai Etruscs in Italie.

(imagjins di commons.wikimedia.org)

Lis liniis di cumierç e lis coloniis fenicis tal Mediterani.

(imagjins di commons.wikimedia.org)

La espansion dai Grêcs tal Mediterani.

(imagjins di commons.wikimedia.org)

I POPUI INDOEUROPEANS

2008-06-03T05:18:00.000-07:00

Vuê in Europe e intune part de Asie si fevelin lenghis che a àn parintât tra di lôr: a son lis lenghis celtichis (par esempli breton, galês, gaelic irlandês e scozês), chês neolatinis (par esempli furlan, rumen, talian, francês, ocitan, catalan, spagnûl, e portughês), chês gjermanichis (par esempli todesc, olandês, frison, inglês, danês, svedês, norvegjês, islandês), l’albanês, il grêc, l'armen, lis lenghis baltichis (leton e lituan), lis lenghis slavis (par esempli sloven, serp, cravuat, bulgar, cec, slovac, sorap, polac, ucrain e rus), chês indianis e chês iranichis.

La difusion aprossimative des lenghis indoeuropeanis in Eurasie vuê.

Lant indaûr tal timp si viôt che dutis chestis lenghis, o miôr chês che lis àn origjinadis, si somein simpri di plui tra di lôr tal lessic e te gramatiche e duncje si è pensât che a vedin dutis une origjin linguistiche in comun.

Stant che in Europe a son testemoneadis ancje lenghis no indoeuropeanis e al somee che a sedin logadis in chest continent di plui timp (par esempli il basc, che al esist ancjemò, l’iberic e il ligur antîc che a son sparîts) si pense che i popui di lenghe indoeuropeane si sedin slargjâts cun dinamichis une vore complicadis e dificilis di capî e che lis lôr lenghis a vedi cjapât il puest di chês feveladis prime.

Tabele che e mostre someancis tra tiermins di lenghis indoeuropeanis antighis

Une teorie e dîs che, intant che i contadins dal Neolitic a colonizin lis zonis plui fertilis de Europe, chei che vuê o clamìn indoeuropeans a cjapin lis zonis plui magris, stant che a son plui di dut arlevadôrs: la economie contadine neolitiche in gjenar e je plui siore, ma ogni tant e à une crisi fonde, par vie des cundizions climatichis o par malatiis des plantis o ben parcè che la tiere e devente masse puare, in chescj moments i arlevadôrs indoeuropeans a puedin vê un vantaç stant che la lôr economie, pal solit un pôc plui puare, e je plui sigure.

Altris teoriis a disin che lis lenghis indoeuropeanis si saressin slargjadis par vie che puartadis indevant di une societât vueriere, che e varès dominât plui di dut pal fat che e doprave il ram e il bronç e e doprave il cjar di vuere tirât di cjavai.

Altris teoriis ancjemò a cirin di provâ une continuitât indoeuropeane za dal Neolitic o fintremai dal Paleolitic.

No si sa cemût che a fossin lis lenghis feveladis intal paleolitic, tal mesolitic e tal neolitic: te ete dal bronç in Friûl si pues pensâ che a sedin za grups indoeuropeans, salacor messedâts cun int che e fevele altris lenghis.

LA ETE DAL BRONÇ

2008-05-31T11:53:00.000-07:00

Daspò di une ete li che dongje de piere si tache a lavorâ ancje i metai tenars (ram, aur, arint, plomp), e che si clame Eneolitic o Ete dal Ram, e tache la Ete dal Bronç: si scuvierç che, fondint intune ram e une piçule percentuâl di stagn, il metal che al ven fûr al è une vore plui fuart e al ven doprât par fâ imprescj e armis.

La culture dal bronç e rive in Friûl tor dal 2.000 prin di Crist e e dure fintremai viers dal 1.000 prin di Crist. Te prime fase de ete dal bronç, li che al somee che la ativitât economiche principâl e je chê dal arlevament, si difont te alte planure dal Friûl, compagn che te Europe centrâl, l’ûs di fâ sepulturis monumentâls pai individuis plui impuartants, tirant sù tumui che in cierts câs a son restâts fin in dì di vuê.

La Tombe di Sant Svualt sgjavade dai archeolics de Universitât dal Friûl
(http://protostoria.uniud.it)

Te ete dal bronç medie e resinte (tacant dal secul XIV p. di C.) i vilaçs dal Friûl a cressin e si difindin cun grancj teraplens. Chestis struturis si clamin cjastelîrs e si cjatin ancje a est, par esempli in Istrie, e a ovest in Venit, te planure padane, ancje se a àn carateristichis un pôc diferentis di ogni bande. I cjastelîrs, in plui di difindi i abitâts, si viodevin di lontan e a vevin di jessi ancje un simbul di domini sul teritori, te stesse maniere che si pense che lu fasessin ancje i tumui.

Il cjastelîr di Grediscje dissegnât e fotografât dal alt. (di www.spilimbergo.com)

Il fat che lis vilis a vedin di difindisi cun oparis cussì impuartantis (che tal Neolitic no si cjatavin) al segne che lis risorsis metudis di bande e concentradis a puedin fâ nassi vueris e che si vûl cjapâlis o difindilis cu la fuarce.

Une spade e un toc di pugnâl de Ete dal Bronç (Museu archeologjic di Codroip, www.sirpac-fvg.org)

I reperts archeologjics furlans a fasin capî che a jerin tancj contats cu la Italie, cu la penisule balcaniche, cu la Europe centrâl e cul Mediterani orientâl.

Cundut che a son avonde testemoneancis archeologjichis no si pues savê ce int che e je in Friûl inte Ete dal Bronç e ce lenghe che e fevele: imprescj, vâs, armis di une cierte sorte a testemonein la culture, ma no corispuindin, par etis tant antighis e nancje par etis plui resintis, cui confins politics e ancjemò di mancul cu lis frontieris linguistichis.

Te ete dal bronç a cressin lis grandis civiltâts de Mesopotamie e dal Egjit e tal Mediterani orientâl si disvilupin la civiltât Minoiche, chê Micenee e chê Itite e chê Fenicie.

Une piture cun dolfins a Cnos, te isule di Crete, che e mostre il sflandôr de civiltât minoiche (imagjin di commons.wikimedia.org).

La Puarte dai Leons a Micene (imagjin di commons.wikimedia.org)

La Puarte dai Leons a Hattusha, capitâl dal ream itite (imagjin di commons.wikimedia.org) .

Il faraon Ramses II te bataie di Kadesh, dal 1274 p. di C., dulà che si vevin regolâts i ecuilibris tra egjizians e ititis (imagjin di commons.wikimedia.org)

IL NEOLITIC

2008-05-29T06:18:00.000-07:00

Il neolitic (in Friûl dal 5.000 al 2.000 p. di C.) al è il periodi de piere gnove: i oms no dome a fasin imprescj di piere sclesade, ma ancje di piere pulide, cun risultâts une vore plui fins e rivant a otignî di un bloc di piere une cuantitât une vore plui grande di lamis che si puedin doprâ.

Une manarie e un grant anel di piere pulide cjatâts a Samardencje di Puçui (www.neoliticoinfriuli.it)

In ogni câs, cundut che il non al à simpri a ce fâ cu la lavorazion de piere, se pe ete paleolitiche la carateristiche plui impuartante e jere la cjace des grandis bestiis, e pal mesolitic e jere la predazion di animâi plui piçui e l’adatament a un ambient gnûf, il fat pardabon fondamentâl dal neolitic al è che a son la agriculture e l’arlevament. In cheste maniere lis comunitâts umanis no dome a cjapin il mangjâ che a cjatin, ma cul lôr lavôr a rivin ancje a produsilu.

Chest mudament al permet une cressite demografiche des comunitâts agriculis e arlevadoris, ancje se si à di pensâ che la presince umane tal ambient naturâl e je ancjemò piçule: il Friûl par esempli al à stazions neolitichis, ma pal plui al è cuviert di boscs une vore grancj e fis, che a lassin puest dome ca e là ai palûts e a cualchi pradarie.

Cemût che al podeve jessi l’aspiet de Basse furlane tal Neolitic (www.neoliticoinfriuli.it)

La culture agricule, tacade tor dal novesim mileni prin di Crist intal Medi Orient, e rive in Friûl tor dal 5.000 p. di C., ma pai prins secui no cambie masse il paisaç: dome cualchi vile di contadins e nas ca e là e in piçulis zonis ator des cjasis a vegnin taiâts o brusâts i abui par fâ cjamps, intant che altris zonis, mancul fertilis, a tornin buinis par menâ a passon lis bestiis.

La agriculture e fâs ancje che lis comunitâts si fissin plui timp intun teritori e che no sedin plui dome nomadis: cun dut achel pai prins milenis lis comunitâts umanis no cognossin ben i fatôrs che a fasin butâ ben la tiere o che le fasin puare, e cussì daspò di une dade di benstâ i cjamps, par colpe che si tornave a meti simpri chês stessis plantis o che si butave masse aghe, a deventin magris e lis comunitâts di contadins a puedin vê une crisi e a àn di cirî puescj gnûfs.

E je tipiche dal Neolitic ancje la difusion di un materiâl impuartant par fâ imprescj e recipients, la ceramiche.

Ceramiche neolitiche cjatade a Samardencje di Puçui (www.neoliticoinfriuli.it)

Lis stazions neolitichis dal Friûl a son avonde impuartantis, sul stes nivel di altris in Europe, e a vevin di jessi in contat comerciâl cun altris zonis: chescj contats si capissin par vie che tai sîts furlans di lavorazion de silice, la piere plui doprade par fâ pontis e lamis, si cjate ancje materiâl rivât une vore di lontan.

Intant che cheste e je la situazion in Europe, in Mesopotamie e in Egjit, in graciis di situazions ambientâls une vore buinis pe agriculture, al tache un procès che dopo de metât dal cuart mileni prin di Crist al puarte a formâsi grandis civiltâts: la produtivitât agricule bondante e fâs che si puedin ingrumâ ricjecis e che si formin societâts li che chestis risorsis a vegnin aministradis in maniere complesse, cun struturis di podê e citâts. In chestis societâts e comparìs la scriture, che intun prin moment e covente soredut par tignî i conts, e si disvilupin figuris professionâls specializadis e classis sociâls.

Rescj archeologjics di Uruk, une des citâts plui impuartantis de Mesopotamie sul finî dal IV mileni (commons.wikimedia.org).

Tal neolitic ancje lis religjons a àn une evoluzion: a tachin a jessi impuartants chei stes elements che a son impuartants pe agriculture, ven a stâi la tiere, viodude tant che mari, il cîl, viodût tant che pari che al feconde la tiere cu la ploie, il soreli e la lune che a segnin il timp e i ciclis des stagjons e des plantis.

IL MESOLITIC

2008-05-29T03:32:00.000-07:00

Tacant plui o mancul dal 15.000 p. di C. la glaciazion, che e jere rivade al massim, e va simpri al mancul e il clime si scjalde simpri di plui fin al 5000 p. di C.: i grancj glaçârs si disfin un pôc a la volte, il nivel dal mâr al cres, grandis pradariis si formin in Europe centrâl e orientâl, intant che in altris zonis, e ancje in Friûl, a cressin boscs une vore fis. Cierts animâi, tant che il mammut, a migrin lontan in maniere definitive e po dopo a sparissin, altris si usin aes gnovis cundizions o a migrin pôc lontan, tes monts, tant che par esempli i stambecs.

Il stambec, che ancjemò vuê si pues cjatâ su lis monts plui altis dal Friûl al jere une des predis favoridis dai cjaçadôrs dal Mesolitic (Jôf Fuart - Foto di Paolo Malisano - www.enrosadira.it).

Ancje i oms si usin al mudament climatic e a cjacin animâi plui piçui, a pescjin, a cjapin moluscs e a tindin ai uciei, cun tecnichis di cjace e di pescje che a dan risultâts une vore bogns. I imprescj di piere a deventin simpri plui piçui e plui rifinîts e a caraterizin chel che si clame periodi mesolitic (il periodi de piere di mieç) plui o mancul tra i 10.000 e i 5.000 agns p. d. C..

IL PALEOLITIC

2008-05-29T03:12:00.000-07:00

Al è la ete de “piere antighe” (des peraulis greghis palaios, antîc, e lithos, piere): in cheste ete i oms a fasin, tant che massim risultât tecnic, imprescj di piere sclesade, ma no ancjemò pulide.

Il paleolitic si divît in trê dadis:

- il Paleolitic inferiôr (par vie che sgjavant al è chel che si cjate plui insot): fintremai a 100.000 agns indaûr

- il Paleolitic medi: jenfri 100.000 e 35.000 agns prin di Crist

- il Paleolitic superiôr (par vie che sgjavant al è chel plui insù): jenfri i 35.000 e i 10.000 agns prin di Crist.

Tal paleolitic superiôr si pues individuâ chest slargjament e cheste diversificazion dai ominidis in plui speciis e sotspeciis:

L’Homo abilis al tache a fâ imprescj di piere, rompintle in sclesis e doprant la spice che si forme in cheste maniere par sbusâ, taiâ, russâ e v.i.. Par ce che si sa al vîf dome in Afriche, plui o mancul tor dai doi milions di agns indaûr.

L’Homo erectus si tache a cjatâlu dal milion e mieç di agns indaûr: al fâs imprescj di piere, al sa doprâ il fûc e de Afriche si slargje ancje in Asie e in Europe.

L’Homo sapiens si pense che si sedi disvilupât tacant dai 200.000 agns indaûr: al è la specie che o fasìn part ancje noaltris.

Tal paleolitic medi i struments dal om a son fats simpri miôr e a son diviers daûr de funzion che a coventin.

Al è un periodi di glaciazion: mieze Europe e je cuvierte de glace e, stant che cussì e je mancul aghe licuide, i mârs a àn un nivel une vore plui bas. Par esempli l’Adriatic invezit di rivâ a nord fintremai ae altece di Lignan e di Grau al rive al massim a chê che vuê e je la altece des Marcjis e de Dalmazie.

La Europe te ultime ete glaciâl

Ancje chel che vuê al è il Friûl al è cuviert di glace fintremai a ret des culinis: plui injù a son prâts e stepis e, a man a man che si va jù pe Basse, ca e là a tachin a jessi boscs, plui di dut di pins.

Il Friûl cemût che al podeve jessi te ultime ete glaciâl

In Europe in chê volte al è l’Homo sapiens neanderthalensis, ven a stâi l’Om di Neanderthal, ancje lui de specie sapiens, ma di une sotspecie diferente de nestre.

Lis comunitâts umanis, avonde piçulis, a vivin di ce che a cjacin, che a pescjin e des plantis e des pomis che a cjatin: par un tant a vivin in maniere nomade, si movin cirint lis zonis miôr par vê ce mangjâ e soredut a van daûr dai moviments dai animâi: di fat, di là des bestiis che a son ancjemò in dì di vuê tai nestris boscs e tes nestris monts, a jerin in chê volte grandis mandriis di mammut, di bisonts, di cjavai, di bûs salvadis.

Il mammut al jere un pachidermi ancje plui grant dai elefants africans di cumò (commons.wikimedia.org).

Tal Paleolitic superiôr l’Homo sapiens neanderthalensis al sparìs e al reste dome l’Homo sapiens sapiens. In plui dai struments pratics, simpri plui rifinîts, cun cheste ete si tache a cjatâ ancje provis di capacitât artistiche e di pinsîr magjic e religjôs. I elements che a tocjin chest aspiet a son chei fondamentâi pe vite dai oms di chê volte: la nassite, la vite, la vision dal mont, la muart.

La sensibilitât pal misteri de nassite e dal part e je testemoneade dal cult de maternitât.

Fasint deduzions daûr di provis indiretis cualchi studiôs al pense di podê capî alc ancje di altris aspiets de religjon. Pe vite a son fondamentâi il mangjâ e la salût, cussì il pericul di mancjance di bestiis di cjaçâ e di malatiis al cjate une rispueste in religjons che a puedin someâ a chês che vuê si clamin siamanichis: il siaman, l’om de magjie, al jentre in contat cun chel altri mont par tornâ a puartâ incà e a fâ vivi lis bestiis za cjaçadis e muartis o la salût des personis.

L’ûr, vâl a dî il bo salvadi, si cjate ancje in pituris rupestris, come cheste une vore famose di Lascaux in France (commons.wikimedia.org).

Si pense ancje che in cheste ete la interpretazion magjiche dal mont e passi par religjons totemichis, che a viodin tai animâi, tes plantis e tai elements naturâi lis maris, i paris, i parincj e i protetôrs di dut ce che si cjate tal mont e cussì ancje dai individuis e dai grups umans.

La sensibilitât pe muart si capìs des sepulturis ordenadis e rituâls.

In ducj chescj miârs di agns la vite des feminis e dai oms e à aspiets une vore dûrs: la selezion naturâl e je une vore fuarte, a sorevivin dome i plui fuarts e i plui inteligjents e lis malatiis, la fam, il pôc mangjâ, i pericui dal part pes feminis e de cjace pai oms a tegnin la medie de vite une vore basse. In ogni câs a son ancje aspiets positîfs: i lûcs li che si vîf (landris e casons di cjanis, di len o di piels) a son avonde ospitâi e tignûts cjalts; lant a cjaçâ une o dôs voltis par setemane si garantìs ce che al covente par mangjâ e, cundut che al è cualchi lavôr par fâ imprescj, vistîts, par netâ e par cusinâ, dut il rest dal timp al è libar.

Par ce che al tocje il Friûl a son pôcs i reperts cjatâts che si pues riferî al paleolitic, massime par vie de situazion climatiche: i glaçârs a cuvierzevin une grande part dal teritori e po dopo, cuant che si son disfats, la aghe e à dispierdût e savoltât la plui part des testemoneancis e cussì vuê al è une vore dificil cognossilis e interpretâlis.

Pieris sclesadis de ultime fase dal Paleolitic, cjatadis tes grotis di Pradis, in comun di Clausêt.

(www.preistoria.unife.it/clusantin.htm)

Cun dut achel si pues pensâ che la situazion intal Friûl di chê volte e sedi compagne di chê di tantis altris zonis europeanis.

LA PREISTORIE

2008-05-29T03:11:00.000-07:00

Ce che si sa dai acjadiments umans prime de scriture e je la preistorie: la plui part dal timp de nestre specie al è passât in cheste ete e dome i ultins miârs di agns a son ce che si dîs storie cun precision terminologjiche, stant che si tache a vê ancje testemoneancis scritis.

Ce che si sa de vite des feminis e dai oms prime che a scrivessin al ven scuasit ad in plen des testemoneancis archeologjichis: vues, pieris lavoradis, creps, imprescj di metal e di altris materiâi e v.i..

Cundut che e covente une vore di prudence e di esperience, i studiôs a rivin a otignî di chescj reperts tantis informazions e cussì a dividin i periodis preistorics in etis segnadis di une cierte tecniche o di une cierte culture.