Su la fin dal secul V d. di C. si forme il ream ostrogotic parsore di un teritori che al cjape dentri lis regjons talianis e chês ilirichis: a mandâ i ostrogôts a controlâ cheste zone al jere stât l’Imperi roman di Orient, ma tal 535 a son propit i bizantins (Bizanzi al jere la capitâl dal Imperi di Orient) che a fasin une vuere tremende par tornâ a cjapâ la Italie. Cheste vuere e dure scuasit vincj agns e lasse dut il teritori talian intune cundizion di miserie, tant che i storics antîcs a contin che i cjamps a jerin blancs di vues. Si à simpri di tignî cont che tes vueris antighis, e dispès ancje in chês modernis, in plui dai muarts militârs e civîi in bataie e pe violence de ocupazion si veve di zontâ chei par fam e malatie: e je restade famose la preiere "A fame, peste et bello libera nos Domine" che e individue perfets chescj trê flagjei, ancje se cuntune sucession di ordin contrarie.
Il ream ostrogotic e altris reams barbarics sul tacâ dal secul VI: dai gôts si cognòs une vore ben ancje la lenghe, testemoneade te traduzion de biblie fate dal vescul Vulfila e in altris documents. La presince gotiche in Friûl e je stade avonde fuarte, ma nol è pussibil assegnâi efiets specifics te lenghe furlane, stant che tantis voltis nol è facil distingui i siei inflùs di chei Langobarts o gjermanics di altris sortis. Tal furlan di vuê a son dal sigûr peraulis di divignince gotiche e ancje toponims, tant che Gôt e Godie.
Passâts pôcs agns, tal 568, un altri popul gjermanic, chel dai langobarts, al passe lis Alps e al è in chest moment che si pues dî che in Friûl e tache pardabon la Ete di Mieç.
2 comments:
vidût le cjartine. Interessant. O ai simpri massedât i vandui cui barbars. Ma i logobarts no erino slâfs? Dutcâs, scuâsit nissun francês ch'o cognós s'al savès che il non France al ven dai francs a saressin mancul siovins.
I Vandai a vevin zirât avonde pe Europe e po dopo a jerin passâts te Afriche setentrionâl, formant un ream che dopo al jere stât disfat dai Bizantins a pene prime de Vuere Gotiche. In dì di vuê il lôr non al reste te regjon iberiche de Andalusie e par antîc, cemût che si cjate ancje tai poemis epics, chei altris popui gjermanics a clamavin il Mediterani "Ventilsee" il mâr dai Vandai.
I Langobarts a jerin un popul gjermanic ocidentâl, come i Francs e i Sassons, ancje se a jerin stâts timp in contat cun altris popui gjermanics orientâi, tant che i Gôts, i Gjepidis e ancje i Vandai.
Post a Comment