2008-06-06

I CELTIS CARNIS

Daspò dal V secul p. di C. si cjate il prin popul che o savìn di sigûr che al à vivût in maniere fisse in Friûl e che si pues dâi un non definît: al è chel dai Carnis.

I Carnis a son une tribù dai Celtis e a àn lassât il lôr non a trê zonis di monts des Alps orientâls: la Cjargne, la Carinzie, il Cragn.


Monedis carnichis

Te Ete dal Fier i Celtis a son un grup di tribûs indoeuropeanis che si slargjin fintremai a cuvierzi une grande part de Europe (lis isulis Britanichis, la part setentrionâl e ocidentâl de penisule iberiche, une buine part di chê che vuê e je la France, la Belgjiche, la part plui ocidentâl e meridionâl de Gjermanie, une buine part de Italie setentrionâl e de Svuizare) fasint incursions ancje plui lontan (fintremai a Rome, che a brusin tal 390 p. di C., lant indevant fin in Sicilie; te penisule balcaniche e in Anatolie, li che un grup si ferme ancje a vivi te regjon de Galazie).

Teritoris li che e je stade une presince impuartante di insediaments celtics

Cun dut achel i Celtis no formin mai un imperi: lis tribûs a son guviernadis di une classe aristocratiche di vuerîrs, che pal solit a elein il lôr re.

A àn une classe sacerdotâl, i Druidis, che e ten une cognossince une vore fonde di astronomie, matematiche, medisine e di ogni altre dissipline: dutis chestis cognossincis a son mandadis a memorie, stant che pal solit i Celtis no doprin la scriture.

I grêcs e i romans a contin che i Celtis a adorin diviers dius e che a pensin che la anime e sorevivi dopo de muart dal cuarp e che e ledi indevant in gnovis vitis.

L'ipogjeu celtic di Cividât al è un sît ancjemò misteriôs: si lu interprete tant che lûc di cult o di sepulture di ete celtiche, ma in realtât no son masse sigurecis su la sô datazion e su la sô funzion. (imagjins di www.museiprovinciaud.it)

La divinitât celtiche plui venerade in Friûl al è Belen, il diu dal soreli e de medisine, che po dopo al ven acetât tant che protetôr ancje dai colons latins di Aquilee.

Statuutis che daûr di cualchi studiôs a podaressin figurâ Belen, cundut che a podaressin jessi ancje di Ercul.

La lenghe celtiche dai Carnis, e dai Celtis antîcs in gjenerâl, no je tant cognossude, massime pal fat che no scrivevin scuasi mai e che par vie de espansion dai romans a àn finît par doprâ il latin.

Tal furlan a son restadis pocjis peraulis celtichis (par esempli baraç, broili, glasine, troi...), invezit a son propit une vore i toponinms, ma soredut l’acent carnic al à di jessi stât fondamentâl pe deformazion dal latin e pe formazion dal furlan.

Te seconde metât dal prin mileni p. di C. e tache la espansion di Rome, che cuntune schirie cence fin di vueris e cjape il domini su la Italie centrâl e meridionâl, e fintremai e vinç il confront cun Cartagjin pe egjemonie sul Mediterani ocidentâl e su lis cuestis iberichis.

Sintesi de espansion dal domini roman, sucedude cun vueris e aleancis.

In Grecie si disvilupin lis poleis, lis citâts stât, che a rivin a tignî cuintri dal imperi persian (cui fats di vuere plui famôs tal 490 e tal 480 p. di C.), che al cjape dentri za dute la Mesopotamie e la Anatolie, ma po dopo si vuastin tes lotis tra di lôr (prin di dut jenfri Atene e Sparte, in plui fasis tra il 431 e il 404 p. di C.). Te seconde metât dal cuart secul la monarchie de Macedonie, che prime e jere une zone periferiche de Grecie, calcolade semibarbare, e rive a imponisi e cun Alessandri il Grant e concuiste fintremai dut l’imperi persian.

3 comments:

Scovacis said...

A proposit di monedis, dulà sono stadis cjatadis in Friûl? Une volte o ai sintût dî a un gno amì archeolic diletant che a lâ su in Cjargne a si cjatin adiriture facilmentri (!.) Ise vere?

Sandri Carrozzo said...

In efiets par rispuinditi o varès di documentâmi di plui, ma che cjatâlis al sedi propit facil no crôt.
Se o pues zontâ une robe: la passion de archeologjie e je une biele robe, ma chê di fâ i gjavetesaurs (magari nol è il câs dal to amì), magari cul rilevadôr di metai e fûr dai sgjâfs autorizâts, e je une brute pratiche. Di fat il ben plui grant che si pues gjavâ di un repert archeologjic a son lis informazions e ogni volte che si sgjave tantis informazions a son distrutis par simpri: chest al sucêt ancje tai sgjâfs professionâi dulà che si cjapin tantis precauzions e si cîr di mantignî intatis parts dai sîts par cuant che a coventaran confermis o si cirarà cun tecnichis mancul invasivis. In tun sgjâf di diletant invezit si disfe scuasi dut!

Scovacis said...

o savevi che tu mi disevis cussì dai diletants ;-)
chel gno amì nol sgjave, trancuil